煎腐皮卷

星期日，成日都冇出街，難得Bibi放假係屋企，梗係要整返少少野佢歎下既，家庭溫暖吖嘛!




冰格有兩張腐皮(係呀，腐皮放冰格儲存先唔會變壞架)，就拎黎做腐皮卷啦，攤一陣解凍，一張圓形大腐皮，分成四等份。

雪櫃得南瓜同椰菜，切少少出黎用，兩片南瓜切薄條，椰菜粗切。我需要有口感，不能切得太碎。

我用咗一件雞扒，去皮切粗絲，以薑汁、酒、生抽、鹽、糖各少許調味，撈勻再加少少鷹粟粉再撈下。

用少少油炒雞絲

放入南瓜及椰菜

兜炒時加入少少水及蠔油，喜歡多點味道的可加少少魚露或鹽調味。炒至雞肉熟就可以收火。(想包起之後的腐皮卷不會滲水，就在收火後，趁熱灑下少少粟粉，再撈勻。)

放入適量餡料(豐儉由人)，再包起來。

我懶，以半枝牙籤鎖實封口。

可以一條一條包好，預備開飯前才落鑊煎香。

因為材料已熟透，只需以慢火煎至各面金黃即可上碟，退出牙籤，一條剪開兩、三件，方便食用。

這一條是以油煎出來的，表皮鬆脆可口，但就容易搶火。

下面這些，就沒放多少油，所以腐皮不會像經過油炸一樣鬆脆，但表皮仍是脆卜卜的。

有人喜歡佐以喼汁，有人喜回鑊加上蠔油獻汁，或再加水或高湯炆煮，各有所好，適隨專便。