終於都食到劉森記

某日睇到篇文章介紹呢間麵店，睇落都幾吸引，都好想去試下，但總係夾唔到時間去。

3/5，終於都等到爸爸收早，我又放假，可以一齊去食啦。

咪以為爸爸成日蒲鴨寮街會好熟呢頭呀，佢都唔係好知有呢間麵店既位置。所以我影埋地圖俾佢，費事佢唔識帶我去。

原來地鐵一出，已經望到佢呢個大大既招牌架啦。我地成兩點半過咗先去到，所以只係等咗兩分鐘，已經可以入座啦。



爸爸心大心細，未坐落之前就話要食薑蔥黑柏葉撈麵既，坐低見到隔離檯有人食鵝腸，又話自己好耐冇食過，就轉軚啦。

我呢，梗係食蝦子撈麵啦，我鍾意豬手，豬手蝦子撈麵加枝忌廉就啱晒啦。

我地當然冇放過食檯面果樽酸蘿蔔啦，我平日係唔多食呢D東東既，都覺得佢相當好味。而且可以中和撈麵既口感，食落更清爽。

爸爸既鵝腸我冇食過，睇個樣都唔差。我果兩件豬手，就相當唔錯啦。至於個麵底呢，真係要俾個讚佢呀，一D鹼水味都冇，蝦子既份量好足，真係好似鋪滿晒D麵咁。

我出咗間鋪之後，忍唔住講咗句: 好好食!