月餅大會2014

16/8/2014(星期六)，擇咗個好日子去打攪人地玩整月餅。點解揀咁早? 唔早D既話，容乜易家家戶戶都有月餅，鬼得閒食我整果D咩? 我人生第一個食得既月餅呀!

呢D係冰皮月餅既皮，我地原本係整四式冰皮既，點知蝦碌咗，咪咪麼麼搞得太晏，只做咗三式: 紅豆綠茶、紫薯同奶皇。

呢度有部份月餅模，我加碼訂咗個"溫暖牌"，點知去到仲有意外收穫，竟然有埋我姨甥仔同姪仔個名，認真有緣呀!

後尾我先知原來仲有公仔餅模，咁我呢D做野冇黎正經既人咯喎，仲唔轉軚咩?

當隻Angry Bird啤到出黎既一刻，真係好開心呀!

呢八粒珍品就係我整既。

呢D係同學仔既，用晒禮盒。

睇得又食得!

至於奶皇咯喎，我地就預備咗咸蛋黃做心，要先蒸熟。

同時間就整定D奶皇餡。

原來要蒸架! 蒸完又要炒下，跟住攤凍又要雪實咗先用得。

跟住又要搓皮，都係要搓完再雪實咗先用得。因為會搞到一手都係，所以冇影相啦。

大家一睇就知，最頂果行係我既。

幸福係人人都想有既，所以同學仔整得比較多。

包完又要雪返硬去定型，先可以入爐。

中途又要髤少少蛋漿，再焗，等佢有少少色。

我地專登唔髤糖啦，費事整到個餅痴立立。白D就白D啦。

呢個月餅仔，將會在我姪仔生日果日出場，等佢高興下。連生日蛋糕都要讓路，等佢睇完呢個餅先准出場。

之後我仲整埋叮噹、哈囉媽咪同米奇。因為米奇實在太難搞啦，所以我只做了一個。

睇下同學仔既盛況!

我一共帶走咗26個奶皇月，原本朋友話我地做得唔滿意既，就拎落去俾管理員食。

但係我話: 就算係刀疤憤怒鳥，同縐皮哈囉媽咪，都一樣咁有內涵，所以我只放棄咗一隻實驗版Kitty。

由早上十點，搞到晚上八點，都好攰啦。Call車打道回府，好彩仲趕到大小不良未刷牙，兩個人食咗兩個奶皇月同一個冰皮。其餘既分開兩日，送晒俾大家同請晒同事食，皆大歡喜!

好多謝主人家既好客，更感激佢為大家做咗咁多事前準備功夫。呢一日雖然好忙碌、好攰，但真係好開心，好滿足。

好感激你俾個咁好既體驗我，仲有豆豆咁親我，同埋你家中兩個王子都咁得人鍾意，佢地會好快大架啦，到時你就有兩個俊男保護你架啦!