冰皮大作戰

好多謝朋友教路，教我點整冰皮月餅。

材料同份量，可以參考呢度
綠茶紅豆冰皮月餅
入面有晒link教你做皮同餡架啦。

諗住星期四放工去雜貨鋪買開邊綠豆，點知又傻下傻下，唔記得落車，買唔到，係超市只買到D奶、粉等材料。

第二朝，一早出到中環，走去街市碰運氣，竟然買到。半斤綠豆好細包架咋，八蚊雞。我爭D改口話買一斤添架，但再諗下: 係喎煮完D豆會漲大，應該會變成好多架喎。而且人地食譜話200g，半斤都有300g架啦，有多架啦。

返公司浸定d豆，晚上咪可以即刻開工咯。

基本上開邊綠豆浸夠水就好快腍，我浸足成日，中間有換過水，一煲就腍，唔駛十分鐘。跟住收火，由得佢係煲入面焗多半粒鐘，已經想唔變沙都唔得啦。隔水隔得好既話，就唔駛炒咁耐。

即係咁上下都夠乾啦。

可以加粟粉水架啦

加完再炒多陣，好快就可以變成一糰。

以下係我實驗後既心得，同大家分享下。

我個人認為，做皮時，將所有粉簛入大碗，另一隻碗放晒d流質野同糖混合好，先逐少加入粉內攪勻，就唔會咁易起粉粒，而且會順暢好多。

至於包皮時，又有咩要注意呢?

我咁鬼懶，係唔會將d餡同皮獨立分開一份份，用保鮮紙包起先放入雪櫃既。



我係等果糰豆蓉同皮攤凍後，用膠袋分別入起佢，就咁放入雪櫃雪凍既。

要加綠茶粉入豆蓉度既話，將部份豆蓉放入保鮮袋，加啲綠茶粉入去，隔住個袋搓勻就掂，亁手淨腳。

做到包既工序咯喎，最好戴即棄手套，用個電子磅秤住分餡。我粒模咁細，只用咗7g綠豆蓉+2g紅豆(我懶，用咗日本紅豆罐頭)，10g皮。加埋19g，多1g都會太多，唔平整架。

秤好一份綠豆蓉餡，我就加少少紅豆做芯，直接挪埋一團就得啦。

同樣戴住手套，用磅秤住d皮去分。
包果陣我又出術，唔戴手套啦，用保鮮紙隔住，放粉皮上去，蓋上保鮮紙，用個透明膠盒蓋去壓扁塊皮，期間可以揭開保鮮紙調整塊皮既擺位，兩野就壓到夠平。



我唔鍾意月餅上沾上太多粉，所以我只在手上抹上薄薄既糕粉，再拎起塊皮黎包，收口後，唔將舊未成形既月餅在糕粉上碌，只用另一隻手，輕輕撲少少糕粉上去，就入模啦。

我屋企係咩模都冇，只得粒食完果凍剩低既膠兜仔。雖然係細粒D，做到咪算咯。

唔熟手，做咗一粒異形出黎，主要係想試下豆蓉同皮加埋既味道係咪ok唧。

你地睇下我既皮幾咁薄，我放少咗糖，效果都唔錯。

跟住我試下加咗綠茶粉入去個餡度，再加埋紅豆蓉，仲好味d喎! 咁我唔加綠茶粉去d皮度啦，又偷懶多一步。雖然糯米粉炒過，但我唔鍾意Kitty搽咁厚粉，所以再改良一下。

睇下，係咪化淡妝好好多呢?

呢一碟，係我帶返公司俾大家食既。

中間好明顯有粒白賴晒既，就係碌過粉先入模既效果。人地Kitty 咁後生，駛鬼搽咁厚粉咩？睇下其他佳麗，都係淡妝咋，脫模後，在手上抹少少粉，再撲到月餅上就夠架啦。

因為有同事唔係綠茶既fans，所以我都專登整咗幾粒冇綠茶既。有四粒係紅豆綠豆蓉，有四粒係神秘味道，咁就要睇下邊幾個幸運兒可以食到啦!