滋味焗薯蓉

簡單既野，有時都好受歡迎既。想當年開小派對，大家都好喜歡食我焗既薯蓉，所以今次媽媽都要順手寫返出黎，等Bibi又多樣野傍身。

只要家中有多士焗爐就可以做到，都幾方便架。

材料: 焗薯、碎肉、乾蔥、牛油

我懶，用咗一粒咁大既乾蔥

切碎

免治豬肉以糖、生抽、鹽、酒調味，再加少許鷹粟粉撈勻。

我選用既係焗薯，貪佢夠軟滑。

洗淨、削皮

開半

再以清水烚腍，可以在水中加少許鹽。

烚至可用筷子順利插入就夠腍啦。

用叉將薯仔壓成蓉

好簡單既，唔駛幾分鐘就搞掂。

在鑊內放少少油

先爆香乾蔥末

加入肉碎再炒

肉碎炒熟，再放牛油，怕肥就唔好放咁多啦，但放多少就會香D。

我就用呢D方便裝既牛油，喜歡清淡既，一公斤既薯仔，兩三粒就夠啦。

跟住放埋D薯蓉入去，撈勻。係呢個時候可以放少少鹽同胡椒粉/黑椒粉去調味，好彈性既，隨你個人口味啦。

撈勻之後，就可以放入錫紙盆或者好似我咁懶，直接攤在錫紙上，約半寸厚，成塊放在焗盆上入爐，焗到熱透，就食得。

喜歡香D既可以出爐前髤少少蛋漿，再焗多陣。通常一上檯，大家就會搶吃，迅即沽清。