依家既晚餐，成日都要轉下口味，Bibi又冇乜飯癮，湯飯又食過啦，咪煮下粥咯．
今次，我開咗係美食節買既冬菰，浸出黎幾大隻呀，又厚身．（都幾爽架，又夠香，用黎蒸肉餅，仲正！）
將佢切成薄片
兩隻就夠啦，切埋都有一碗仔架
Bibi鍾意食薯仔，所以我又切咗一隻焗薯黎煲粥
果皮要先浸軟，刮去內層既囊先用，咁就唔濕熱啦．
米就浸過先煲，哈！我今次就早上浸咗，放入雪櫃，放工先用．
買舊豬展用粗鹽醃兩日，用水沖淨，煲滾水，出出水先用．（用返上次幅相算啦）
凍水放果皮，水滾就全部野放晒入去
記住呀，剛剛放晒ｄ材料，有機會粘底架，係咁意攪攪佢啦．
大滾就轉中小火咯喎，間唔中都要睇下火架，因為ｄ粥越煮越杰，舊咸肉又重，有機會墜底架．
煮到ｄ米開花，粥又夠杰身，就撈返舊咸肉出黎，切開佢．（我就用鉸剪剪碎佢既）
掉返入煲，加少少鹽調味，再滾返先食就最穩陣啦．
ｄ粥都算綿啦，我只係用咗一個鐘去煮咋喎．
Bibi就幾欣賞啦，你呢？
沒有留言:
張貼留言