星期六放假咯，就同爸爸入元朗行下啦．早一個站落車，去元朗廣場睇下蜘蛛展，冇咩特別，係咁意睇下就去食野啦．
兩點幾，避過咗食晏時間，入到去發記就有位坐，但當時既入席率都有八成架．
黎到呢度，唔叫生滾煲仔豬潤粥($18)，真係唔係幾對得住自己，所以就即刻落單啦．成煲粥滾熱辣，起碼有十塊八塊既厚豬潤，好正呀！
呢碗係滑牛粥($18)，唔關我事既．咁啱我身邊有個記者，佢點咗滑雞粥($37)，豬潤腸粉同煎蘿蔔糕（我見佢食果陣係冒煙既），猛咁用專業相機影相，ｄ食物就係咁意試下就請人俾外賣盒佢打包啦．我諗佢唔多接受到豬潤，碟腸粉佢撩過下就留低咗啦，仲將食過既雞骨放上面，晒野！睇怕佢既食評都唔慌會中肯啦．
食完野，去咗十蚊店，見到好多新版雕刻用橡皮，我好克制呀，只係買咗兩枝馬油就閃啦．
跟住我去咗街市，買咗兩斤豆卜，呢度專賣豆卜既，廿蚊斤，都幾靚架．
好貪心，叫阿姐同我將三款豆卜都執齊湊一斤．嬸嬸對我咁好，就醒佢一斤啦！佢話係西環，俾五蚊，個檔主俾咗六粒佢咋！
順手買咗半斤魚滑，要黎釀下豆卜都好呀．
見到有平粟米賣，十蚊六枝，買咗一份，跟住諗諗下，嬸嬸好似都想要架喎，再執一份添．大鑊！重死！
咁既陣容，真唔係野少架．
非常嫰，剝完出黎兩大袋，分一袋俾嬸嬸先．
一心諗住去好耐之前同事買過俾我食既花生糖專門店買花生糖既，一路行都唔見有ｄ咁既鋪頭，又唔記得店名同地址．
打道回府，竟然俾我係轉角位見到間店！老闆十分大方，試食都係俾大大舊你既．
$22一盒，我揀咗三併軟糖，花生鬆化，糖軟糯，芝麻香氣撲鼻，簡直係花生糖中既極品．
買咗兩盒，可惜因為已經負荷唔到，冇乜心機再睇其他野．返到屋企先見到盒上話有香蕉糕，薑糖等等，早知就試埋先啦！
沒有留言:
張貼留言