大家有冇買過雞心豆呢？其實呢種食材唔單止有益，仲好好味架！尤其煲素湯既時候，加埋佢，就寧舍香既．
我就多數買有機既，一包三百克．
其實落多落少，係好隨意既．
你地要記住呀：各種豆類發芽時，都會產生少少毒素既，呢ｄ毒素會溶於水，雖然未至於會食壞我地，但最好都係先浸下ｄ豆，過清水先煮啦．而且，經過趨芽作用既種籽，就會變成一種生機食物，營養價值亦相應提高架！
我通常會浸過夜，等ｄ豆快淋ｄ．
今次我除咗放雞心豆，仲放埋眉豆，多ｄ野食下麻．係啦，兩種豆都係要浸一輪，過清水先用呀．
果皮要先浸軟，刮去內層既囊先用．據老人家講：呢層野係濕熱既，咁我就照做啦．
如果浸過ｄ米先拎黎煲粥，就會快ｄ開花．但如果你想ｄ粥再綿ｄ，可以浸完之後，隔水，加少少鹽同油醃下佢先煮，效果就更理想啦．（老實講，我今次冇咁做喎！）
咸瘦肉，我買咗舊豬展，用粗鹽醃咗兩日，沖淨咗，煲滾水，出出水先用．
萬事俱備，我係一個超懶人，放凍水入煲內，就一二三加晒ｄ果皮（果皮一定要凍水落架，如果唔係就燥喎），豆豆，同咸肉．
再滾起，就加米，搞搞佢，確定冇粘底．再大滾就轉中火煮幾個字，跟住轉細火，煲到ｄ米開晒花同粥夠杰身就食得．
撈起舊咸肉，切碎佢，加返入ｄ粥度就食得．
我今次趕時間，放咗工返屋企先煲黎做晚餐．前一晚就浸定晒ｄ野，放係雪櫃，到第日放工返到屋企先煮，一個鐘內都食得啦．
咁我係懶人麻，真空煲咁好用，平日呢，其實可以係大滾之後煮十分鐘，放返入外殼入面，隔半個鐘再拎返出黎，大火煮二十分鐘，都差唔多架啦．
點解唔見碗粥既相？掛住食，冇件事咯！醒起果陣，都食到七七八八咯．
沒有留言:
張貼留言