我細個果陣，其實零食都有好多種類架．有ｄ就係大人覺得生積既，例如冰凍酸木瓜，話梅呀，果ｄ咸濕野．
我記得細個第一次食香口膠，係讀緊幼稚園既，點解我記得？事關我三歲就搬家，同步上幼稚園，所以時空記憶係會分得清楚ｄ既．果次我大家姐見我口郁郁，就要我丫大口，跟住佢發現我食緊香口膠，就即刻好慌張咁命令我吐咗佢．
係呀，果粒香口膠，係我自己買架！以前咁細果陣，我係有機會跟大人出街架，去到ｄ士多仔度買野食，邊個話細路唔曉呀？我夠知果ｄ係香口膠，唔吞得落肚咯，我真係冇咁史提拔呀！做咩咁晒要我吐喎．．．．仲有好多味架！
依家我就介紹一款我讀小學，係零食部有得賣既東東你地睇下，就係五香蠶豆啦！唔係炸果種喎，唔熱氣既．
呢ｄ古老野，已經冇乜機會係市面見到啦，家陣要等人返上海，先會有機會食．
唔係嚇你，佢竟然曾經係御用貢品黎！
佢其貌不揚，實在都幾硬下架，可以叫佢做蠶豆乾既，但一ｄ都唔脆既．
嬸嬸話要棚牙唔係假既先食到，近年我ｄ牙都唔係咁靠得住，所以只係食幾粒，過下口癮，叫做回味下算啦．
面頭有ｄ香料粉粘住既，呢ｄ已經冇我細個食果ｄ咁大粒啦！（或者果陣自己細個，睇既野都大ｄ都未定．）
係回憶中既小學小賣部，一毫子有交易，係長條狀既白色唔透明既膠袋仔袋住既，面頭印有紅色字既．一包好似有五粒咁上下啦．以前食果ｄ呢，就偏向啡紅色皮既，依家呢ｄ就偏向墨綠色．
放入口，又硬又un，但細路就會覺得好滋味啦，有時我地就慢慢剝開ｄ皮，再食ｄ肉．又或者成粒放入口趙，逐少逐少吞入肚．
老實講吖，咁多年來，佢既味道都冇乜點變，而呢隻牌子，品質亦相當不俗，可以講係越趙越香，幾好食架．
我帶咗幾粒返屋企，有晚Bibi開夜車，無意中發現佢，俾佢食晒．但佢話：因為我果陣有少少餓，所以咪食晒咯，但我唔覺得好好味喎．
或者．．．我食佢果陣係計埋ｄ感情分入去啦．
沒有留言:
張貼留言