雞翼撈麵餐

呢次係食團購「瑞士咖啡室」原價$62（現在只需$31）招牌瑞士雞翼撈面+餐飲（冷／熱同價）+火腿奄列及牛油多士。現場食果陣，見到餐牌瑞士雞翼撈公仔麵常餐正價只係＄４５，就算加埋凍飲都係＄４８，似乎有少少作大。咁依家俾＄３１有得食，都叫ＯＫ平咗既。

佢宣傳話：使用瑞士汁煮的瑞士雞翼，肉滑而細嫩，香甜惹味，牛油多士外層香脆，裡面嫩軟，D牛油仲流緊！好好味！

等我黎話俾大家知對唔對版吖拿。

我地既凍鴛同凍奶茶，不過不失。



牛油多士外層香脆，裡面嫩軟，D牛油仲流緊，呢句野一Ｄ都冇錯。讚！

勁足料既庵列，雖然唔係大大份，都交到貨。

瑞士汁同麵都係好熱既，合格，但瑞士雞翼就只係室溫咁上下，可能佢驚老得滯啦，肉都係鞋鞋地既。點講呢？好似Ｄ學生大食會整果Ｄ雞翼咁上下啦。

汁係好夠多既，爸爸成碗倒晒上去，變咗湯麵咁款。我就冇咁做，所以食得企理D。(佢開動之前問我係咪可以倒晒D汁入去，我話得，佢話我跣佢喎。)

我分咗Ｄ麵同庵列俾爸爸，食完兩個都好夠飽啦。

小插曲係：

落單果陣，阿叔好似唔多知有團購呢回事，要拎張優惠券去收銀度先明白。再埋黎同我地落單果陣又好懂咁問：你地兩位飲Ｄ咩呀？咁我點咗餐飲，就以為佢曉落單啦。

點知佢只寫入咗一份餐既指示去廚房，所以只出得一份餐。我都覺得唔妥架啦，坐咗一陣追單，另一位侍應話：知啦～，但又唔見佢跟進喎。

又等多陣，見到水吧出餐果度Ｄ人都好ＨＥＡ，現場又冇乜客係度食野。有Ｄ奇，搵返之前既呀叔。

佢坦白從寬：我第一次寫呢Ｄ單，只落咗一份，已經幫你追加返架啦。

冇緊要啦，又唔趕時間，爸爸食到一半，我果碟先黎，好彩果一刻佢未食飽咋，如果唔係，佢實唔肯同我食Ｄ麵唧。