一寸小人- My Sis

未雕過人像印仔，始終都要有第一次既。

呢個係我既七家姐，見佢個髮型都幾易雕，就搵佢黎做下實驗啦。呢個樣，有八成似佢架。



佢既特徵係嘴上有粒墨，其實就算我畫得唔似，屋企人一睇都會知道我整緊邊個。

其實畫佢最大既困難係.... 佢冇乜眉毛既，所以條眉可以講係監生畫上去既! 俾佢後生D，又唔好畫到佢咁肥，但雙下巴都要俾少少架，如果唔係就失真架啦。而個嘴咩，畫果陣又求其，所以雕果陣就出事啦.....

貪快咯，CHUR一聲就一刀過，冇晒層次感啦。

整體黎講，D線條都係幼過髮絲既，加陣上咗墨，化化地先得咁粗，你地都應該想像到佢本身D線係幾幼啦。

至於有幾多個%似佢真人呢? 我地好少見既，分隔兩地咁耐，眨下眼都廿年有多啦。

唔係我誇口，都有六成似架! 我指警訊果D拼圖呀。

就等我D親戚佢地睇過，先知呢個印仔係咪似似地我家姐。不過，呢個只係我做既第一個人像印唧，鬆手D好喎老友，算合格架啦。



Bibi就話似既，不過就靚過真人少少。

若然佢美國果D成日對得佢多既朋友/同事都話似既話，先算成功呀。