魚露炒飯

一枝魚露，係我屋企係幾難毀滅下既。

我今次就用佢黎炒飯。

材料有: 薑米、蔥粒

雞蛋



蝦仁切粒，加少少胡椒粉同魚露，炒到八成熟。我係臨時要整既，所以D蝦仁係由冰格取出，用水沖淨，再用廚房紙索乾就切，加入調味就即炒。

免治肉，我用豉油、鹽、糖及粟粉調味。

炒熟兜起備用

冷飯用餐具搓鬆

用油爆香薑米(蔥未有咁快落住，但我將佢同D蔥粒放得太埋，唔覺意加咗D唧)



將飯炒熱，加蝦粒及肉碎，兜炒一輪，到佢地都幾熱下先得喎。

中間撥出一個窿，加幾滴油，下一隻蛋

快手兜亂

主角又出場，放D魚露再炒下。最好就拋下鑊，令佢更均勻。



最後加蔥粒，炒幾下，你就聞到蔥既香味架啦。

好快脆，香噴噴既魚露炒飯就整好啦。見唔見到煙呢?

可以收火畢起佢啦

呢兩兜就係我同爸爸既飯盒啦。