西芹炒魚柳

有日，嬸嬸醒我兩塊魚柳，加一樽愛心咸菜胡椒豬肚湯。




放工即刻要試下先! 

原本諗住就咁煮啲飯，整咸菜胡椒豬肚湯飯就算架啦。但返到去，又好想試下呢啲澳洲入口既多莉魚柳喎。



因為啲魚柳原本係放係冰格既，所以我放工用保溫袋拎到返屋企，仲未解凍。我拎咗一塊黎試食，另一塊放返入雪櫃。隨意沖洗一下，連水都冇索乾。好心急要做下實驗。

我斜切件魚柳，8mm至1cm厚。因為未解凍得晒，所以好易切得平整。



跟住用黑椒粉及鹽調味，再加粟粉撈勻。(唔係事必要黑椒粉，只係我用晒D胡椒粉唧。)



先測試魚既味道，我煎薄薄的兩小塊來試味。唔，呢款多莉魚腥咗啲喎，唔適合就咁煎黎食，咁就要用另一種方法處理啦。



大家記唔記得頭先我係冇索乾水架? 我專登既，一來我塊魚柳根本未解凍，入面含水量會較多，洗完索乾都冇用。二來我跟住既處理方法，跟本就唔駛索乾水份既。人懶吖嘛! 而且仲可以慳功夫兼慳埋廚房紙，一舉兩得。

好，我先煮滾半小煱水，將魚柳快手夾入去，d水變返蝦眼水(咩叫蝦眼水? 咪有小氣泡開始升出黎咯)，就收火。用筷子搞幾下，令魚柳均勻受熱，隔水備用。呢個時候，魚柳應該熟咗大半架啦。

點解唔就咁倒晒兜魚柳入去? 你唔記得拿? 兜魚柳加咗鹽同黑椒粉，再撈粟粉，之後係會出水架，夾魚柳入煲度，就可以隔開果啲好渾濁既魚水啦嘛。

另備少少滾水，加少少鹽，灼一灼啲西芹(即係飛水呀)，隔水備用。



嗄? 唔知點處理啲西芹? 拿，我只係用咗兩瓣架咋，清洗乾淨之後，就用刨將向外一面既表皮薄薄削去，由頂部節位以下，向外屈斷，順勢將藏在中間的粗纖維(筋)撕出。若成功的話，西芹表面應該會呈坑紋。未能一次撕到底，亦可從另一面(即接近根部的一邊)向外屈，再撕去餘下的粗纖維。然後斜切成粗條。

因為要快炒，驚手忙腳亂既話，就係飛過水既魚柳上加定少少蠔油啦(唔駛多架，用黎吊下味唧)。



我係超級懶人，所以一切從簡。先在鑊內放油，爆香薑片。

一口氣將西芹及魚柳回鑊，駛出幾下拋鑊功夫，好快就將呢個小炒煮好啦。



咁樣整啲魚柳，就唔腥啦，一來係西芹同薑片既功勞，二來大部份既腥氣都去晒d水度啦(你唔記得頭先我將d魚柳飛過水咩?)。加上少少蠔油吊味，咁就變成色香味俱全既西芹炒魚柳啦。



睇下: 爸爸個飯盒係咪充滿愛心呢?



我當然唔執輸啦，係蒸飯果陣，順便燉返熱啲湯。先用多少白飯試下我呢碟小炒，味道確係唔錯。跟住再加啲白飯去啲咸菜胡椒豬肚湯度，實行食湯飯，真係超滿足呀!



幸福其實好簡單架咋!