工展會2008

專登放日假去下工展會，曬到咩咁，爭d溶啦。

係咁意巡個圈先，都算多人啦，而且今年既擺位好似好亂咁，搞到人冇乜行既意欲，冇見到三只小綿羊既檔，所以冇機會見到二少奶個囡囡既真身。

肚仔餓，唔通靠試食去頂肚咩？走去美食廣場先，我地兩個人，買咗兩個蛋撻、兩串（即係八粒）素花枝丸、一枝豆漿、一只蟹粉小籠包，打下底，然後先去掃貨。

行黎行去，冇乜特別好野。普遍食物都比美食節貴，可能真係物價高漲啦。其實全場最實惠既，反而係梅州既攤位。佢有特產臍橙，睇佢ｄ皮冇噴過野既，一杯即榨橙汁都係十蚊唧，都幾好味架。同場亦有佢地盛產既柚子賣，我都試過，品質非常好，亦係十皮一大個，好抵買。可惜我老定得滯，諗住臨走先買兩個返屋企，人地三點零已經賣晒啦，想食過翻尋味都唔得添。

終於買咗有機花生糖$15/100g、有機蜜糖$48、有機紫無花果$22、杏脯乾$18、大棠荔枝園既蛇舌草一小枝$8(麻麻，飲豆漿好過)、台灣既醬油膏$17（用佢黎炒上海年糕就正啦）、素肉碎$9、兩款Vicenzi既酥皮卷$20、三包金菰$10、三包魔芋絲紮$10、三包花菰$100、同埋我事必要買既壽桃牌麵食$170。咁就全場加埋消費咗$551啦！

好失望，搵唔到鬼佬有機糖薑，雖然現場有一檔有有機糖薑賣，但超甜，而另一檔既就係黑糖煮過既，唔係我想要果種。我食開果款好似蕃薯乾咁上下色同乾身既，一粒粒丁方既，冇得賣，算啦。又冇德清源既蛋喎，仲專登唔買蛋，諗住今日買埋添。唔知係咪懶，連二德惠既檔都搵唔到，所以連有機豆漿粉都買唔到。

不過，今日既收穫都算唔錯啦。