買d好野食下＋南瓜湯

今日一早食完早餐就去shopping，行惠康買咗包新登場既米，原產地台灣, 叫做三好糙米。賴係巴閉咁，見米身咁短切切，好似珍珠咪咁款，反正我都要買糙米，又有特價(兩公斤卅幾蚊)，就整包試下。整多包寧波年糕，俾錢果陣只係四十幾。弊！蠢咗！唔記得嬸嬸吩咐話要儲印花，冇買多少少湊夠五十皮添！

見唔見到呀? d米係肥碌碌架!

加埋白米一齊試煮過啦, 真係好正喎, 一d糠味都冇, 而且口感好好.

跟住走咗入屈人寺買包Hart杏仁。係原味黎，美國產，冇加調味既。市面都有好多原焗杏仁賣，但我就同ｄ同事將唔同品牌齊齊擺出黎一試高下，都係呢只牌子味道最好，杏仁既品質都好高，食得出有果仁既甜味。

食完飯，一心去ThreeSixty買有機雞翼既，但居然俾我見到有機雞柳今日做特價，由$189變$160兩磅喎！咁即刻轉軚啦，雞翼都要$99兩磅啦。爸爸話：我地平日係屋企已經多數食素，如果煮肉就唔好再食ｄ冇質素既肉啦，食返有機架啦！咁我地又唔食得幾多，冇乜所謂啦。

最衰試食咗一舊仔鬼佬minced pie啦，死咁甜，咪又拎ｄ香草包、麥包黎食下，清下個口咯。點知食到芝麻麵包條之後，就出事啦！又買。$27，貴！但一諗起搭忌廉湯係幾咁襯，就毫不考慮咁拎咗一包啦。

其實晚餐我只係要咗少少飯，因為想盡快飲湯，可以食佢。

等大家都食晒啦，淨返幾條，包返起佢留返聽日食先。弊！冇影相添！得返幾條, 都可以俾大家睇下既。

咁ｄ南瓜湯呢？真係好抱歉，入晒長頸樽啦，還原唔到啦。

不過，我可以話俾大家聽，尤其係有小朋友同老人家既家庭，南瓜好有營養，而且非常適合糖尿病人享用。但就咁煮黎食或者咩蒜頭豆豉炆真係唔係人人都識欣賞，但將佢變身成為南瓜蓉湯或者忌廉湯，就可以輕易地將叛逆既心扭轉。

方法好簡單：

1. 南瓜肉切一厘米厚件，用水煮淋（落水比例：一半水、一半南瓜）。

2. 水滾起計大概煮十分鐘。撈起ｄ南瓜，ｄ水由得佢留係個煲度。有攪拌機就用機搞爛，冇就用叉同篩整爛都一樣既唧。

3. 倒返D南瓜蓉入煲裏面，加少少油（當然啦，有橄欖油就最好啦），滾返之後，隨個人喜好加ｄｄ鹽同胡椒粉或者黑椒粉，咁就飲得啦。（咁點解要放油唧？因為咁樣身體會更易吸收南瓜既營養！）

但係，如果你想變下口味，有鬼佬忌廉湯feel，可以放真既淡忌廉。如果想經濟ｄ，就去吉之島十蚊店買一盒盒既調味白汁磚，放日式咖哩磚既貨架上可以搵到，面頭有ｄ西餐白汁相果只。一家四口既份量，放三份一盒就夠啦，因為已經有調味，連鹽都可以慳返。呢隻味係最容易令年輕人接受既。

當然啦，要豪ｄ既，加ｄ海鮮食材就梗好味，鬼唔知May姨係女人咩！