聖誕禮

每年既聖誕節，我個老闆(雖然唔係佢出糧俾大家既)都會送好多酒獎勵下年中幫佢做野既同事。例牌一枝紅加一枝白，由我未開始跟佢既廿年前計，佢一路都係咁送既。到我接手之後，送酒既工作同名單就由我決定, 而且越來越長。

有次老闆問我：係呢，駛唔駛預埋你？

嗄！乜你覺得我有必要學飲酒咩？(花幾舊水買酒，我情願要本書好過。)

以前係興包禮物咁，將成枝酒用玻璃紙或者禮物紙包起既，仲要再搵絲帶縛個蝴蝶結添。所以，我已經係一個超熟手女工黎。個個同事行過，都知我又係度大製作。我就當然好手勢啦，駛乜講，大大話話都包咗十年有多啦，偶爾都會有同事拎住張花紙過黎叫我幫手包一包佢地送俾人既紅酒既。

整整下，潮流興環保咯，我就側側膊，唔多覺，就咁用絲帶縛下樽頸就算。咪睇呢度得咁少酒呀，呢種金絲帶係介手架，縛完晒呢堆酒，手指都痛架，加上我縛薑餅人既傷未好返呢，真係傷多二錢重。

跟住, 仲要安排送俾大家, 有d係要送出街既. 為咗減輕馬省蓆哥哥既工作, 可能情況下, 我都會叫準物主上黎我公司提貨既.

希望大家可以普天同慶, 飲杯勝!