以毛會友 - 送給大家的聖誕細禮揭曉

搞咗一大輪，終於都做好晒d聖誕細禮。

首先，好多謝各大鬼佬雜誌既硬皮封面、各大銀行及公司贊助既硬皮廣告單張，順利成為薑餅仔既佈景板，仲有ｄ同事做完bundle之後唔要既colour divider，剛好用來印祝賀語。

跟住，又要多謝各種產品既新鮮直板膠套及玻璃紙包裝袋，成功為薑餅仔營造一個五星級的家。

再要多謝自己乜鬼得意野都走去買下，終於珍藏咗三億五千萬年既膠片粒粒都可以古老當時興，令薑餅仔更為滿意我俾佢既家居設計。

最後，牡丹需好，都要綠葉扶持，全靠我心血來潮，係石板街呀婆果檔未人間蒸發之前，執到跳樓貨既靚靚絲帶（早知就買多ｄ啦，十一號行過，檔野已經瓜咗啦）。

仲以為教識咗個女，會成為我既好幫手添，佢係就係有做過十件八件既，後尾又話忙就停工啦。最後仲要打劫返我轉頭，佢話佢都想送ｄ俾人喎！

呢度150件架啦! 呢個角度去影, 你地又點睇到吖!

就係咁，每晚做十零只，又要抽時間粘卡仔，又要包紮好晒ｄ薑餅仔，坐底二百個薑餅人喎（早知係咁我就拎去 St. John's Cathedral 度義賣啦，不過果輪又未有靈感諗到呢條橋），大大話話都做咗成兩個星期架。因為係分批做既，所以佢地既膚色會有分別。

初初以為做幾十個薑餅人都夠啦掛，點知做完又好似唔夠數，再做多ｄ，又好似漏咗呀邊個邊個咁，再做到百幾個啦，點解仲係唔夠分咁既？一心以為限量版做一百八十二個啦，乜都夠啦！點知唔記得廿五號仲有一班青少年朋友仔未計落去呀，咁有乜理由唔過二百粒吖？

我初時只係諗住做黎送俾親友，想佢地開心下，事關大家都好鍾意收到呢ｄ禮物仔，尤其係我ｄ家姐，實拎去show俾ｄ晨運友睇，又或者帶去老人中心度威威既。

見今次條橋都算新，市面又好似冇同類產品供應，相信愛好手作仔既朋友都會歡喜卦？所以先敢話送俾大家做禮物唧。唔敢做咁細，費事大家話我孤寒。我保證，一個普通力度既乞chi係唔會吹得走我既薑餅仔既！

做完係有後遺症架！你地諗下，做薑餅人都算輕keng，粘卡仔又輕鬆，剪膠袋同玻璃紙都冇乜難度，而且好enjoy添。咁衰咩呢？

就係衰在縛蝴蝶結之前，要用好幼既鐵線定位，紮好個口！百幾二百包既鐵線紮作係咩境況，你地都估到啦。終於食指d皮就花晒，好似無啦啦生咗好多倒刺咁，鬼咁痛，睇怕都要抖幾日。有冇搽野？搽咗啦！

依家又有難題啦：點解明年咁快過農曆年架！我賀年手信就訂咗啦，但有冇氹人歡喜既小年禮呢？仲未有靈感喎！起碼要應酬十幾個家庭添架，鬼叫我地係大家族咩！

唯有睇佢地命水啦，搞得掂就做，搞唔掂就一於扮懵啦喂。

我係唔會咁傻做全盒俾佢地既，事關我唔鐘意買外面ｄ盒，太大個啦！我自己果個全盒，係用環保物料做既，太花功夫啦，做過一次都怕黑啦，咪搞！