我都覺得自己好好彩，叫做自我訓練有素，總算可以輕輕鬆鬆煮到幾味。本來今日呢個炒飯係應該由Bibi主理既，但佢呢輪比較忙，又要彩排會考放榜打氣大會既司儀，所以都係等我示範俾大家睇下，點樣係短時間做好二人份既足料炒飯啦。
欖菜肉碎炒飯
材料有：
主角冷飯，記住打鬆咗先呀
肉碎（約$10），即係百佳買既本地屠宰免治豬肉。先用豉油、糖、鹽、胡椒粉調味，再加半茶匙鷹粟粉搞勻。（記住調味少ｄ冇所謂既，過多反而難搞）
2009年7月31日 星期五
2009年7月30日 星期四
印仔五十六 － 兔兔孖寶
因為有朋友十分喜歡兔兔，所以連帶我也會留意一下兔仔的網頁。
在我沉迷刻章的三分鐘，認識了這對兔寶寶 - Jobe及Sasa，亦令我回憶起廿多年前在朋友家作客的趣事。
想不到在我收起一切刻章的東西後，正在研究各款蛋糕的當兒，這位慢了七十拍的兔媽媽Sabe竟來找我。雖然她提供的相片並不適合用來刻章，但我旋即找到另一張更好的來替代。
雖則打鐵要趁熱，草稿上星期早擬好。拖了數天，星期一終於轉印在橡皮上。晚飯後檢視郵件，見有小朋友留言，問我何時再刻印章？噢！順應要求，又再下海，立即開工。
順得哥情失嫂意，工作空間太小，實在難以同時兼顧幾種手作呢！喜歡粘土的朋友又或者喜歡印章的同好，請大家稍為忍耐一下，由得我率性玩玩吧。
縱觀整張工作檯，已被做粘土的東西淹蓋。筆刀躲了在哪兒呢？（好端端的躺在放刻刀的膠兜內，但我視而不見。）
一口氣刻好印章，證明這把刻刀仍然鋒利無比。選那一個顏色的印台好呢？先試蓋水印，效果不錯。
人家是黑白色的兔兔呢，開一個白色印台，找來黑色硬卡紙，試蓋一下，雖則因為爸爸在我蓋章當兒向我提問，令我分心，引致顏色未能夠均勻（賴地硬呀！），但效果相當不錯啊。
就讓這個白雪雪的印印飛到物主手中，由得她自行決定用何種顏色的印台來配合這對寶貝的形象吧！
僧多粥少，就當作May姨送給你的中秋節、重陽節、國慶、生日、聖誕節、新年、元宵節、情人節、結婚週年、愚人節、復活節、勞動節、端午節、拍拖紀念日及回歸紀念禮物啦！
2009年7月29日 星期三
念舊 II
呢個手袋, 望落去唔大, 但係好大食架, 連我所有雜物: 縮骨遮, 不織布環保袋, 銀包, 鎖匙, 兩枝潤唇膏, 兩包紙巾, 香口膠, 電話, 萬能卡片式小刀加剪刀工具, 加埋d林林審審既雜物同一大本書(我書不離手, 所以成日都有本書既, 連金庸新修版武俠小說都裝到), 甚至加多個大橙都冇問題!
佢仲連兩套皮帶, 有長有短, 可以揹, 又可以手挽, 好方便.
可惜, 皮帶既邊位用得耐會甩甩離, 披口, 有礙觀瞻, 見唔見到有條白色毛線咁既野突出黎呀? 但袋身又好地地, 連袋入面都仲好新淨.
我咁長情, 梗係晨咁早, 已經買定一個同色同款既做士啤啦!你地睇, 新同舊都冇乜分別, 我仲係用緊舊果個, 除咗條帶肉酸d之外, 真係冇乜理由嫌疑棄佢既.
2009年7月28日 星期二
點解爸爸要煮兩煲飯既?
昨日Bibi早上跟我返公司屈蛇，十二點約咗同學會既學員一齊去麥Sir屋企研究「中五放榜打氣大會」事宜，都係會夜返架啦，由得佢同同學食埋飯啦。
我放工就去百佳氹一轉，返到屋企爸爸正在晾衫。走入廚房，爐頭上有煲老火素湯正在煮緊，砧板上有一堆薑蓉，菜心就浸咗未洗，雞脾菰已經準備妥當，最奇怪既係飯仲蒸緊，我見到時間制仲剩十分鐘。（平日咁既鐘數，已經開得飯啦。）
望下個洗碗盆，咦！有個煲係度浸住，煲底黑晒既？
我冇出聲，洗洗手就去洗菜，跟住雞脾菰炒菜心，煎荷包蛋。叫爸爸拎d野出去。
哈哈！點解有兩煲飯既？唔駛問呀貴，一定係有人玩整煲仔飯，想整到有飯焦，但又史提拔，煲燶晒啦！雖然佢已經轉咗個煲，但係一打開個蓋，真係聞都聞得到啦！我同爸爸講，Bibi真好彩，避過一劫呀！為免我責怪，所以爸爸就蒸多一煲飯，等我冇得投訴。
我一個人又點食得晒另一煲飯吖？於是，我就用薑蓉、肉碎、潮州欖菜同蛋，炒咗飯帶返公司食啦。
2009年7月27日 星期一
Sweet Sweet的感覺XXII - 紅莓戀曲
又一個標準庄蛋糕 ，但今回忌廉做得幼細一點，共有十八駝。用了士多啤梨蛋糕做底座，加上紅莓果醬、新鮮藍莓粒，以及一片橙糖作裝飾，鮮艷奪目。輕輕加點金箔，就更添貴氣了！
2009年7月25日 星期六
爸爸 - 唔好啦掛? 又黎!
爸爸上星期又話肚仔唔舒服，鬼咩，上次腸胃有事，好返冇耐，又貪心，星期六下晝同我去食下午茶，霸住晒兩杯奶茶黎飲。「你飲水得啦！」咁都講得出口既。明知就打風架啦，又掛住行街，係都要去搵2GB既手指，仲話要短d既。依家仲邊興2GB吖？情形就好似SD Card咁，依家仲邊有人去買二百幾同五百幾MB既卡架，咁又點會再出呢。係咁兜，站站停，我話天色開始變啦，刮風啦，就黎落出雨啦。仲唔肯走，終於搞到落狗屎。好啦，肯死心啦，又話要我返轉頭再行下喎，跟住又要我同佢去影視鋪買Michael Jackson既DVD。「你自己入去啦，我係度等你。」「….」我都知佢架啦。「陪你入去啦，如果唔係你唔會心熄既。」入到去，MJ既CD都一疊，DVD又好多隻。我話：「你要知道喎，你係想睇佢跳舞咋喎，根本就唔識聽人唱咩。要買到正式MV版先好，如果唔係，影黎影去都係個頭，或者pan咗去d觀眾度，盞搞。」終於都冇買到就走啦。大家想唔想像到，一個呀叔，成日係咁睇MJ，仲學人玩moonwalk（當然係唔似果隻啦），PG家長指引都黎唔切，應該訓覺又唔去訓，我可以點吖？
返到去，五點幾，又lur住要上Youtube睇MJ，一路搞到Bibi八點幾九點返。我煮咗日式咖哩，爸爸食食下話覺得d野寒，唔食d瓜。晚上掛咗八號同九號風球，明知會中途落波，爸爸都冇早d去訓，半夜d風又嘈到拆天，點會訓得好，又掛住一早要開工攞車喎，終於又出事，個胃又唔妥，仲係反胃果隻，唔肯睇醫生，死都唔肯食葯。星期日仲要開廿四小時特更添，拖下拖下就又一日架啦。晚上，爸爸打返黎話佢又嘔啦。
話就話星期一唔駛開工唧，爸爸一路都食唔到野，個胃唔舒服，一味訓都冇用架。夜晚煮通粉俾佢食，都食唔落，淨想飲湯。咁由得佢啦。
到咗星期二，Bibi要返同學會，爸爸雖然有開工，但仲係好唔舒服，唔接佢啦。終於爸爸頂到半夜（搵夠車租但油錢都蝕埋），去咗仁濟睇急症，照咗X-光，話佢腸冇事，但胃損咗。要佢第朝攞一星期葯，如果食完冇好轉就要入院照胃鏡。話咗佢唔好睇d打打殺殺片同MJ架啦，搞到個人咁抗奮。佢就懶我，話我冇好好睇住佢，仲俾咁多奶茶佢飲喎！嘩！咁都得？
星期三，爸爸終於都肯停工啦，放到星期日晚先開工。食咗葯都仲係冇胃口，好煩。叫佢煲粥食，佢話食唔落。「咁飲粥水啦。」呢日係日全蝕既日子，雖然香港只係可以睇到日偏蝕，但係個氣氛都好易俾人感受到。爸爸凌晨睇完急症，早上要去屯門醫院攞藥，我叫Bibi起身陪佢去。爸爸梗著數啦，咋死要Bibi拖實佢，兩父女溫馨咁去取葯，又一齊睇日蝕。放工我買咗方包返去，爸爸食咗半塊。晏dd，佢又走去煲粥，我見到咁大煲，叫佢唔好一次過食咁多，分兩次食啦，好彩佢都肯聽。等Bibi等到洽眼訓，頂唔順，入房洽下。未洽著，Bibi就打黎話落咗車啦。即刻入廚房炒通粉，到佢返黎就即刻有得食。爸爸聞到味，走咗出廳，又拎咗雪櫃d車厘子黎食，仲問車厘子可唔可以夾麵包。唔係啦掛？啱啱叫做食得返野，好心佢就咪鬼咁為食啦。我印咗d關於胃炎既資料，佢就睇都唔肯睇。
星期四，下晝，爸爸打黎話好想飲老火湯。我就傳短訊俾佢，如果佢搵到淮山、杞子、茨實、蓮子、龍眼肉、眉豆、花生、果皮、蜜棗等材料，都可以用，但咪亂黎。放工返到去，爸爸煮咗飯，但係d餸…真難頂！果d素肉片，佢話用咗豉油、豆粉、糖黎調味喎，呀茂信佢咯，甜耶耶既，梗係冇聽素食鋪呀姐教既方法，走去淨落糖啦。其餘既材料好似菜心同南瓜都係緊緊熟，而雞脾菰就比較熟，唉！甜既，好難頂，我問佢係咪冇落鹽，佢又話有。算啦，好醜食一餐，我只係留咗自己個飯盒（知道麻，咁難食我都要食兩餐呀~~~），冇留俾Bibi，都費事害佢。我一入門口，已經聞到一陣當歸味，我問：「你唔係落咗當歸去煲湯吖麻？」我真係好憎人亂咁黎既，一早已經傳咗短訊話佢知有咩可以落架啦，做咩仲放埋d咁野喎！我就唔信佢分唔到啦，話當咗佢係淮山？當我傻架。
星期五，同Bibi商量，不如叫爸爸淨煮飯好啦，我情願放工返黎煮餸，都唔想食d咁野。所以，我就親自示範如何處理素肉片，用豆豉黎炆南瓜，加埋煎豆腐同蘑菰炒蛋，Bibi總算開開心心咁食一餐啦，仲添飯呢！爸爸就食到連汁都撈埋，仲話原來素肉係正既。係啦，好地地既材料，冇用心煮，即係浪費食物呀！今日既湯正常d啦，只係得杞子、茨實、蓮子、龍眼肉、果皮、蜜棗、赤小豆、扁豆、玉竹唧、南北杏。
2009年7月24日 星期五
Sweet Sweet的感覺XXI -Home Sweet Home
同事新居入伙，例牌因為搬屋事宜，搞到一頭煙。擾攘一輪，終於都可以煮返餐飯仔，同老公撐下檯腳。
這幾天，見她心情煩燥，好像不太順心。碰巧這會兒我又在玩粘土，順手拈來，做了這個蛋糕送給她，希望她心情轉好。
二人世界，當然要甜蜜溫馨。我選了粉紅色做蛋糕底，圍上忌廉糖霜，添幾駝鮮忌廉，綴以香桃糖粒，再加幾片鮮橙，中間放上兩顆士多啤梨，還是覺得有點空洞洞的。呀！有了！放點點黑白朱古力條，整個蛋糕就更完滿了。
2009年7月23日 星期四
2009年7月21日 星期二
念舊 I
我好鍾意呢個銀包架！佢雖然好平，買果陣好似廿零卅蚊咋，但佢好好用．我同Bibi一人一個．外面仲連埋散子包，我可以連memoary stick都放埋入去．
打開裏面，有好多放卡既位，雖然可能要一隔放兩張，但唔會迫迫夾夾既．放卡片既位置下亦有暗格放身份證之類既野．
至於放銀紙既內隔呢，仲多了一隔有拉鍊既，可以再放一ｄ野入去．最重要既係, 無論我放咗幾大疊卡同銀紙加埋散子入去, 都唔會太大舊!
但係佢實在太殘，已經俾我用到ｄ公仔甩晒色．終於都監硬換咗呢個銀包：
佢都係連埋散子包既，但現代銀包有個好大既缺點，就係唔係好裝得晒ｄ野．
以我標準既師奶本色，出門口最好就盡量簡單ｄ，咪又銀紙包，散子包，卡片套咁鬼麻煩，最好一個搞掂晒，仲要唔好咁大件添．
初初轉銀包果陣，放ｄ信用卡入去，係唔夠位既，即係放完第一張，下面果幾張就要監硬塞入去，到拎出黎用就會唔就手．有冇搞錯呀？咁即係用唔到啦！咁唯有包返佢，睇下邊個啱用送咗俾人啦．
你地睇，原本左右每邊三隔放卡既地方，我只係放咗一張架咋, 放多張都逼．
因為係三疊既關係，放銀紙既隔隔反而超長喎！
後尾我唔忿氣，再整理過佢，係散子包果度放晒多出黎既圖書證，會員卡，少用既信用卡，Door Card，etc.入去，終於都用到呢個銀包．
舊果個，洗返乾淨佢，放返好，或者第日會用返都未定！佢真係好實用架! 乜有人話呀嬸唔用得公仔銀包既咩?
如果大家有機會見到邊處有得賣上面同款既Kukumalu老鼠仔銀包，記住通知我呀！
2009年7月20日 星期一
玄米薏仁茶
行淘大花園既百佳廣場，見到有賣韓國食品既貨架，見到呢盒玄米薏仁茶。爸爸話要買，一盒廿包，廿六個幾一盒。
雖然唔貴，但係都要警告佢：「嘩！一陣唔好飲點算呀？你睇幅圖，所謂茶，唔係我地認知果款黎架喎，d色咁濁既。你知自己籠野架啦，一陣唔好飲，就咋咋帝帝，係度話飲咗肚仔唔舒服，就放晒係度唔理架啦，到時邊個同你飲埋佢呀？」
爸爸:「呢d野，難飲極有個譜啦！」
「等我睇下成份先啦，你副"大眼仔"呢？嗄，漏咗係車呀？哼，又要我晒眼力啦。咦，有埋花生、大豆同葡萄糖既，應該甜甜地既，咁既組合，照計都ok既。算啦，咁就整盒啦。」
返到屋企，放低晒d野就冇件事啦。晚上等Bibi返，等到餓餓地，醒起呢盒東東就沖杯黎飲。
鬼識睇韓文咩！好彩有圖畫，看圖識字。
放入杯，加滾水，搞勻就飲得。
唔會好似花生糊咁杰撻撻，稀稀地，係搞得溶既，有幾粒花生碎粒，又有少少米香味，淡淡地既，又唔甜，幾順喉，頂到少少肚餓之餘，又唔會飽。幾好，買得過。
2009年7月19日 星期日
Sweet Sweet的感覺XIX - 弄瓦之喜
同事再次弄瓦，上回已經送過一個粘土蛋糕給她，今回孩子正值我的刻章高峰期出生，本打算為她刻一個名字章作賀禮，但女孩兒的名字一直未有定案，一拖再拖，七月上旬才套取到有關資料。
要刻章，當然不能缺了小姐姐的份兒啊！那就要一次過做兩個印章，草圖有了，基座備妥，臨時郤步。還是幹回我的老本行吧！
這幾天，在研究新招數，為士多啤梨添妝容，就出動巧克力漿吧。
先預備一張「身體健康、快高長大」的祝賀牌，切兩片鮮橙、搓幾粒薄荷巧克力粒粒、預備兩顆沾了特濃巧克力漿的完熟士多啤梨、再加上鮮忌廉圈及香橙果占，為新生兒送上點點祝福。
2009年7月18日 星期六
簡樸的滋味 - 翡翠綠豆糕
經常一起乘村巴的街坊早上給了我兩塊綠豆糕，說是專程托人到台灣時採購的美食，不容錯過云云。
她早前曾在香港的台灣食品展推廣買了雷同的產品，但味道相去甚遠，所以才懇請人家為她當一次採購員。
包裝的透明膠紙上沒有註明成份，只印了「翡翠綠豆糕、天然有機、港記酥皇」等字。真有那麼滋味嗎？
拆開一塊試試，用小匙搯起一些吃吃看，入口綿密，淡淡的豆香，甜甜的滋味，頗佳啊！吃到中段，見有一丁點深顏色的東西，原來是紅豆蓉呢。
街坊說, 還有一款鴛鴦味的呢, 更加可口, 可惜未有機會試試.
向你推薦這款可以單用舌頭品嚐的美味。
2009年7月17日 星期五
Sweet Sweet的感覺XVIII - Happy Anniversary
做了一個心形蛋糕, 賀人結婚週年紀念, 用了香桃啫哩粒, 加士多啤梨及鮮忌廉圍邊, 飾以紅莓果占.
待乾後, 加添一層透明啫哩, 閃閃生輝!
希望大家都滿意啦!
2009年7月16日 星期四
2009年7月15日 星期三
訂閱：
文章 (Atom)