今日，約咗師奶同Pri去幸福蝎度玩，我整咗蘆薈橙汁啫哩糖拎去食。
原定由爸爸車我入天水圍再轉乘貓巴士入大埔既，我上咗車，就開始落雨，呢個司機叔叔去到天水圍先話：「唔記得打氣添！」唔係啦掛！石油氣車一冇氣就要搵人拖車架啦喎。衰在佢對新界路又唔多熟，邊度有氣站呢（唔係個個油站都有得入氣架）？大件事！
Call上台問台姐，請問天水圍最近邊度有加氣站？
旋即有回應：環X工業中心。
爸爸：清楚，唔該！（嗄？清楚？做咩唔問人果個咩中心點去呀？）
終於，佢隊本地圖俾我，要我搵。唔係啦掛，可唔可以停埋一邊，等我搵下呀？以我用地圖既認知，正路係先睇大廈索引既。
爸爸：你盲架？我粘晒ｄ旗仔做咩架，一揭就揭到天水圍果頁啦。
天水圍都有兩版架，我又唔識路，最快既辦法梗係睇索引啦。跟住佢就監梗要我係天水圍果兩頁度，搵油站既標誌啦。點搵呀？本地圖又細喎，佢去到天耀村肯停低啦，又落咗車，問後面架綠的。綠的呀叔又係傻下傻下，教唔到佢。
爸爸上返車之後，即刻又開車咯喎。後來我見到好似有個油站既紅色屋頂，好開心咁話佢知：「咦，呢度有個油站喎。」
爸爸：「你想飲油呀？你估個個油站都有得入氣架？」
跟住爸爸一路驅車到合益路，塞車添！時間一分一秒咁過去，距離約定時間尚有十五分鐘。個天仲越落越大雨添！
爸爸：「塞到出路口都夠鐘啦，一係你自己截的士去啦。」
雖然我係路盲，但我對眼未盲，我見到架車經過新元朗中心，跟住爸爸就兜入工廠區。到我見到中石化既油站，開始鬆一口氣。終於係死火之前入到油啦！
到我可以轉到貓巴士都過咗五分鐘啦，跟住我地去火車站兜埋呀Pri。去到呀蝎度，又冇雨咯喎。我冇咩可以送俾佢，只係做咗一個高跟鞋印仔俾佢。
另外搵返我第一次做麵包仔既私己出黎，裝上螺絲釘，變成電話繩，送咗俾佢地。
呀蝎真係整咗老婆餅請我地食呀，不過．．．
我諗大家都明既，我地三個客人，冇人記得影相，一路食、食、食！
「唔，裏面爽爽地既，好好味。」
食到最後一啖，我先識驚叫：「唉吔！好慘呀！未影相呀！」佢地兩個已經食晒，師奶仲好老定：「佢一定唔止得三個既。」
蝎：「係得三個咋！」
師奶唯有把握最後機會，影咗我手上果一啖老婆餅啦。
事到如今，我唯有去呀蝎度偷啦！
時間過得好快，六點鐘，爸爸黎接我啦，我一踏出門口咋，就開始落幾點雨啦。我上咗車之後，仲落到好似倒水咁。跟住，我地去咗上水買齋飯外賣。返到樓下平台，又冇雨啦，點知我一上咗樓咋，又再狂風暴雨。
爸爸：「你咩人黎架？睇下，一入門口又落大雨啦，搞到我想唔拎遮都唔得。」
沒有留言:
張貼留言