Bibi入廚記

女孩子，唔係要話第日服侍邊個，始終都係有返多少生活技能好ｄ既，長大咗起碼都可以自理吖麻。

依家ｄ小朋友唔學似我地幾十年前ｄ學校咁（尤其係女校），有咁多家政堂上。我地小五就會學織冷頸巾同車野架啦，到中學咩，我就更精彩啦，事關我係讀銅鑼灣果間何東既。星期日先同師奶地講起，我果個年代係要考升中試架。佢地居然話：「我地夠考過咯！」

佢地有幾大呀？梗係唔知我講緊咩啦。我地果陣仲未有九年免費教育架，讀完小學，考到好成績，先有機會讀上去。如果唔係就要去私校度諗辦法架啦。

我中一開始就要上烹飪堂，仲係個個星期都上既，好似係有三節，通常一節係theory，兩節practical。一年中式廚房、一年西式廚房，中三就混合，中四若會考選修呢科，就要讀得更深入架啦。

就係因為當年基礎打得好，煮一般既飯餸對我黎講，真係呼吸咁暢順啦。

星期一放工，趁住Bibi冇返港台，我一入門口就要佢入廚房啦。

係雪櫃拎咗包肉碎、四只蕃茄、一罐切片磨菰，就要佢開始預備。先醃肉（呢樣佢偶爾都會做，所以都識既）、跟住切蕃茄（我切咗一只示範）、開罐頭沖洗下ｄ磨菰。好快就搞掂，跟住拎埋兩粒蕃茄磚。

我之前同佢講解過步驟，話正式黎講要先爆肉，鏟起，再爆其他材料既。見佢咁論盡，新仔麻，咁就一鑊熟都冇乜幾多人食得出既。

為咗易處理，我俾佢用易潔鑊，放咗一匙橄欖油(唔駛放咁多油既，健康d吖麻)，就放ｄ肉落鑊啦。

「快手兜勻佢啦，用鑊鏟壓下佢，打鬆ｄ肉碎啦。」係旁邊睇，寧舍肉緊，唔想出手，如果唔係就唔算係佢煮架啦。

「快手ｄ啦，變肉餅啦，我地唔係煎豬扒呀。」就係肉餅呢兩個字，激勵佢動作快ｄ，倒埋ｄ磨菰入去兜下（係呢個時候，其實有好多肉，已經俾佢搞到變咗肉片架啦），跟住倒埋ｄ蕃茄同蕃茄磚，再加水。兜下，等佢滾起。又再兜勻，煮一陣，放少少鹽、叫佢試下味，佢話ｏｋ，再打獻。大功告成！

「嗱，以你地ｄ咁既年紀，煮到ｄ咁野出黎，都見得下人架啦，咁你第日去camp又好，去人地度大食會又好，都叫做整到味似似地既野出黎吖麻。你應該自己搞得掂架啦，材料又易買，去超市就買到啦。」

Bibi:「蕃茄磚係咪好多地方都買到架？」

「係十蚊店或者日式超市先買到既，如果你一早諗住煮呢樣，係屋企帶定去都得啦。如果冇蕃茄磚，唔落都得，放多d蕃茄都係一樣既唧，但就要自己加鹽同埋糖去調味啦。」

你地睇下，呢鑊野都叫做得啦。

仲可以留埋我地兩個第二日既午餐，幾正！

Bibi應該好有滿足感，佢食完呢碟飯(見唔見到d糙米呀?肥嘟嘟一粒架,靱靱地,又唔硬喎, 幾好食架)，仲添咗少少飯。

而我咩？夠晒爽啦，半滴汗都冇出過，就有得食啦。