沒有Bibi的三天

星期五，Bibi入咗camp，原以為可以同爸爸他他條條踭檯腳，點知又到爸爸腸胃不適，佢都唔舒服咗幾日架啦，一味話自己唔夠訓，所以肚仔唔舒服。我就話佢日日飲咁多豆漿，食瓜咗自己就真！唔單止冇胃口，連諗起食物又或者見到靚女都想嘔呀（鬼咩！車著個有臭狐既靚女）。終於，拖到星期五下晝，上埋推拿班，先去睇醫生。

醫生話佢腸胃過敏，俾咗幾隻葯佢，其中有止瀉同止嘔既，佢食咗一次，就冇再反胃啦。夜晚，我只係整咗一塊麥包多士俾佢食，仲俾咗少少蘋果佢食。

星期六，為咗俾少少家庭溫暖爸爸，我返工之前已經發好咗d通粉（預咗佢分兩餐食），又煮落咗湯底：昆布、黃芽白、素雞丁，留張字條，等佢起身可以自己滾起有得食。十點鐘打返屋企，佢話有胃口食野啦。到我放工返到去，佢已經食埋午餐啦，仲話驚自己唔夠營養，加咗只蛋添。咁好啦，五點幾，佢又肚餓咯喎，我又去煮ｄ通粉出黎，今次煮多ｄ。拎到出廳，我仲專登拎多隻碗，我都食埋一份。費事佢一開始就話：「煮咁多，點食呀？」一陣又話要佢監硬食，又話辛苦，咪又怨我？我只係兩匙、兩匙咁放入自己隻碗度食。咦，真係好好味架喎！到煲內剩返一碗，我就問佢食唔食得晒？佢個樣好似嫌多咁，我就食兩匙。之後，佢就食到一滴湯都冇啦。

好，我咪自己叮包即食意粉食咯。我食蘋果，佢又要食。唔夠兩個鐘，佢又搵餅食啦。九點幾，又lur食麵咯喎，我冇佢咁好氣，由得佢。

星期日，爸爸又要開工廿四小時。都預咗係咁意，做夠車租就算，所以預咗同佢一齊食午飯。我冇食早餐，五點幾俾佢嘈醒，之後睇下書，做下蛋糕，佢十點幾就返黎啦。急急如律令喎！佢話今朝五點幾已經去過架啦。

諗住去淘大食齋飯，點知人地十一點半先開呀。去百佳買夠二百蚊野先，諗住張收條可以有兩小時免費泊車吖麻。之後我地就食咗曼如飯同叉燒黃金扒飯套餐，果度既餐牌要刻意避開動物名稱既菜名架。

食完，諗住去客務中心蓋印，原來百佳同惠康既收條係冇優惠架！但工作人員知我唔係街坊，都俾我免費泊車。原來果度平日一至五，只要十二點至兩點內入閘，就算唔消費，只要去客務中心蓋好章，都有兩小時免費泊車架！咁就真係方便大家購物同食飯啦，尤其對職業司機，呢下真係好呀。

跟住，爸爸又車我去大埔農墟買有機野，我掃咗兩包椰糖、一包薑糖、一束紅色羊角豆、一個四斤重既南瓜，都唔駛二百蚊既。係車度忍唔住用紙巾抹條秋葵黎食，點知俾佢ｄ毛拮親，叫咗一聲，爸爸話：你知唔知唔應該嚇司機架？咁好容易有交通意外架！返到屋企，爸爸又再急急如律令，睇怕冇食野幾日，一下子食咁多唔同既野入肚，可能佢ｄ腸胃未適應到呀。