Bibi入營記

Bibi星期五去太陽計畫既宿營，三日兩夜。叫佢星期四早上好執定野啦，事關佢下晝已經要返學，要十點幾先返，冇時間執野架啦。
之前哦咗佢幾次，好執定野啦。「知啦，等pre-camp briefing咗先啦。」
終於呢，星期四早上msn我：
cap帽放係邊架？
咪係房入面個膠兜度咯。
我唔要呢頂呀，好難戴既。
咁係櫃入面果頂黃色架啦。
我唔想戴果頂呀。
咁漁夫帽得唔得呀？
都得既，咁係邊呀？
衣櫃入面咯。（冇耐又問）我搵唔到喎。係咪衣櫃下格呀？
係呀，再搵真d啦。（最後又咪搵到！）
咁屋企有冇便利雨衣架？
有，係後面書架果邊，牆角位果d兜兜度。
搵唔到喎，但我搵到件唔便利既，咁我用架啦。
嗄？即係厚d果隻呀？你攤出黎睇下佢有冇問題先好拎喎。
我拆開過架啦，依家企圖塞返佢入去。
毛巾呢？拎邊d呀？
毛巾仔，用黎抹汗既，你櫃桶咪有咯。沖涼後用黎抹身果d，唔駛帶咁大條啦，用洗面巾size得啦，拎一條索水d既咪得咯。
咁不如用游水果塊鹿皮巾啦。
嗄！果條野？（三億五千萬年冇游過水咯喎）你拎出黎睇下佢有冇事先好喎。雖然佢一路都係濕住咁keep係個盒入面，臭唔臭架？點知佢會唔會老化咗，唔用得架？（其實我唔係好信呢塊野既，賣到咁貴，但我見d游泳教練都係用佢。）
銀包仲有幾多錢呀？
….今晚問你咪得咯。
咁八達通呢？
….
你咁點得架？唔通要搞到過唔到機先知咩？大個啦麻，自己要留意下至得架啦。如果唔係，就懵下懵下咁做人架啦。
我一返屋企，就搵到d便利雨衣啦，起碼有五包係度，點搵野架佢？放定一包係佢背囊面。
夜晚成十點半先返，未食飯就走去開電腦。
咁夜仲開機？
係呀，麥Sir話唔滿意大家既功課，要我地返去再改下，加反多d感想入去，要兩點前交呀。
咁冇計啦，我唔理你啦，唔好搞到咁夜啦，第二朝又要五點九起身。跟住我就走去訓啦。
話就話由得佢自理唧，但到第二朝，都係忍唔住提佢：帶咗放牙托個盒未呀？有冇帶多d士啤tissue呀？眼鏡盒呢？
我知我忍唔到口，職業病呀！