除夕，約咗小網友豬瑩係Cafe de Savoy食午餐，佢當然有食物自備啦！我同佢媽咪呢，就叫咗豬扒，豬瑩媽就配紅湯同金粟菜飯．
我呢，就配南瓜湯同薯角沙律菜．六十幾蚊個餐，俾ｄ咁既貴價鬼佬生菜你，真係算係咁啦．豬扒軟滑，薯角熱辣，沙律菜又新鮮，非常好．
侍應姐姐早早俾多只碗，豬瑩亦好合作，食晒自己ｄ私伙飯，就進攻餐湯同蒜蓉包，仲食完一件又一件添．
今次我終於都試咗佢地既咖啡啦，都唔錯喎．食完飯，佢地就打道回府，我就返公司開工咯．再見啦，出年再同你食飯啦．
四點九十分放工，坐村巴出碼頭，去呢度食飯．
爸爸要開工，我同Bibi就可以作反啦．今次去咗沖繩料理．Bibi要咗鰻魚飯，湯烏冬，魚生，泡菜同麵豉湯．
我要咗沖繩便當套餐，睇下幾多野食！
八角炆豬肋條，豬手同豬腩肉，全部都好腍既．
苦瓜係沖繩名物，當然就變成有本地（H.K.）特色既苦瓜炒蛋啦！裏面都有粒粒好腍既豬腩肉架．都幾大兜，好彩有人幫口食．
三式魚生，我要求唔要生甜蝦，佢俾咗北寄貝我．
估唔到兜黃芥末都幾攻鼻，勁過washabi呀．
爸爸打黎，話一早煲咗湯，要我地反屋企記住飲．噢！飲咗麵豉湯，加埋呢杯餐茶，返去仲要飲湯，好彩今晚仲要倒數唧，冇咁早訓．
熱檸水意想不到地順喉，檸檬一ｄ都唔澀．
埋單一百八十幾，平日係全日都唔加一既，但今日係特別日子，我食緊果陣都聽到侍應收錢時話要計加一，仲要係講咗收幾多，到找錢先話要收埋加一，找少ｄ＄俾人客喎！咁做就真係有ｄ唔啱啦，佢門口仲有超大張指示寫住全日不收加一架．佢要人地埋單先講話今日要加一就唔係幾啱啦，就算要收都應該在入座前知會一聲吖．佢都冇講我知架，但我早就聽到，所以有心理準備．
食飽飽，行一陣，見到呢間新開既精品店，有超多鬆弛熊賣．
亦有好多Precious Moment既禮品添，真係結婚，生仔，畢業，生日，樣樣齊呀！
入店內打個白鴿轉，一般文具，價錢非常合理，爭ｄ忍唔到手買套blow up膠水玩具添．最後只係買咗一張貼紙同兩張磁石貼，仲平過我屋企樓下間文具店呀．
沒有留言:
張貼留言