今日，專誠請假，由屯門去香港仔取經．好不容易求得專家教路，唔學就笨啦！
材料：
皮：低筋麵粉一磅，花生油及水各一碗（八安士碗裝到九分滿咁上下，咁多油？唔驚架，一陣炸既時候，熱力會逼返出黎既．）
要注意，唔同既麵粉做出黎既效果會相差好遠架．我邊曉吖！食完早餐，求其去街市Ｄ雜貨鋪買既．據伯母講，呢隻"白菜嘜"品質好，搓出黎既粉糰好軟熟，製成品自然勝人一酬．誤打誤撞，又俾我買到呢包百絲牌低筋麵粉．
認清楚啦，一包係一磅庄既，一次過用晒，夠方便．記住先留起一湯匙粉喎！
餡：因為伯母有糖尿，而我正正係想做比較健康既油角，解解有糖尿病朋友的饞，做些油角讓大家嚐嚐．所以今次的餡，除了碾碎的炒香花生，炒香芝麻，椰蓉外，只加了少量砂糖．
材料已備，可以開始做了！
大部份人都以為放豬油，角皮先會脆，其實想角皮脆，唔一定要放豬油架，係有竅妙既．原來秘訣一，就係要係個煲內先燒熱油，然後將麵粉倒入去，搞幾搞，加埋水，一路搞勻，變成咁．（記住呀，咪燒熱油就去加水架，因住ｄ油彈死你呀！）
跟住就可以搓粉啦，八十歲老人家，搓皮仍然有力，好野！（就算大家想多做一點，免得過都係唔好隨便加大份量黎搓啦，情願搓完一糰再一糰，因為一磅粉係最易駕馭既．）
搓好咗既皮，係唔駛等發酵架，將成糰野放返入頭先個麵粉膠袋內保濕．
係檯上撒少少乾粉，點少法？即係你用手掂下Ｄ麵粉，跟住抹拍上檯，抽一舊皮出黎，放上面，跟住又順便將手上粘住既粉拍係粉糰既面就得啦．
用麵杆碾薄粉糰
我話頭醒尾架麻，呢Ｄ野等我做得啦！
見唔見上面隻杯仔呀？係啦，就係用佢啦，伯母好似同我有心靈感應咁，預咗做迷你版油角呀！冇錯啦，就咁用杯吸Ｄ圓圈出黎咯．
放上恰當份量既餡料，鑷實條邊，鎖好佢成為一條花邊．
我整既角仔，好易認，條邊係唔同既，伯母都話我超合格呀！
右下角好似花師奶髮型果Ｄ，係伯母做既．
咪睇少呢兩盆野呀，有成二百零幾隻架！
想油角更脆秘訣二：風乾兩日先拎去炸
可惜我趕住走麻，咁呢個步驟就唔用啦．咁好啦，我地開始炸啦．
先要測試油溫，見唔見筷子邊既氣泡呢？差唔多架啦．
順勢倒Ｄ角仔入去，用筷子不停搞，令每只角仔都炸得均勻．
順便夾起那些笑口常開的，點解？因為爆開咗既角仔，入面既糖會漏出搶火，有損其他靚靚油角既花容．
咁呢Ｄ係咪唔要呢？唔係，當Ｄ靚仔靚女炸好晒，先掟返呢Ｄ入鑊炸過咪得咯．
想油角更脆秘訣三：炸到微黃就要撈起啦，隔下Ｄ油，竭一陣再翻炸．
炸完第二盤角仔，剛好可以翻炸之前果兜角仔啦．
經過兩輪洗禮後，靚靚油角就誕生啦！全部角仔加埋，除開大家試食／偷食果ｄ，秤起都有斤半咁重．點解咁輕？因為我地只係放咗好少餡咋，所以咪唔會重秤咯．
呢隻就係我做架啦！
睇下我三億五千萬年前做果Ｄ，差唔多樣唧．
一隻約三點五厘米大，可以一口一隻．
跟住，我地吃韓國泡菜炒年糕．
冇理由就咁洗劫咗伯母就拍下籮PAD走人架？所以我繼續留低，幫佢做埋送俾親戚果Ｄ．
越包越就手，我又玩野啦，右面果幾行，係再細Ｄ，肥Ｄ架！
炸完出黎幾咁豐盛！伯母晚上就要拎黎送人啦！
玩咗成日，我都係時候打道回府咯！
插曲係，下午，伯母既五歲小孫女黎到搞搞震．佢係一個頑皮貪玩既鬼靈精，初初我見佢向印傭姐姐發脾氣，都知佢曳曳啦．但冇耐我都順利將佢降服咗，佢仲口口聲聲叫我姐姐添！（咁叫我，點好意思吖，都係教返佢叫我Ｍay姨啦）跟住佢就成日同我講悄悄話啦．
怕佢煩，我叫佢入房睇下呀公做緊乜，點知佢回報：呀公睇緊電視，佢睇緊女仔呀！笑瓜我．
佢走黎拎住個硬皮日曆頭問我：你知唔知呢個係乜吖？打開，蓋埋，嘟！
我答：影印機！（啱啦！）我係咪好聰明呢？
係我咁有童心，先知佢諗緊乜架咋！
沒有留言:
張貼留言