由於原定既日子雀屎要返學校當值，所以係佢屋企搞既小小細食會就要提前舉行．就係咁，原本要參加既人數銳減，得返五個，但呀草話：人少有人少既玩法，咁好啦，照去啦！
我地食完晏仔，就去街市買餸，原本既糯米釀雞翼，因為人數少，Mabel就唔整啦，雀屎亦冇整沙律，我既意粉佢地仲係想食既，所以就照買材料，意粉有啦，蘑菰有啦，肉亦買埋，當我地係街市打算向蕃茄進發時，竟然俾我見到有餃子皮賣，咁我就同大家講，不如轉軚包餃子好過啦．於是即刻買埋菜心，天律大白菜，韭菜同冬菰，就上雀屎家啦．
上到去，先浸冬菰，跟住就開始做橙汁軟糖．佢地預既份量唔足，唯有做半份．驚甜，又減咗糖既份量．
好快搞掂，放入雪櫃．
跟住就係粘土時間，我知佢地手腳慢，所以唔敢搓ｄ混合粘土俾佢地用，用較貴既純Grace．今次做呀草既最愛，蜜柑仔．
一隻做貼眼仔既，另一隻做點睛既．
呢只係邊個既呢？
佢地都好俾心機做，整完一隻又一隻，我就講解完畢就入廚房，雖然冇買到蕃茄，我仍然用蕃茄磚同蘑菰肉碎做咗少少意粉俾雀屎帶飯．另外亦分咗一ｄ俾大家試食下．
小琪兒要晏ｄ黎，所以冇得整，我地都預咗一隻送俾佢．
大合照，冇晒鐵線就做坐係度架啦．
呢隻係Mabel做既，越做越得呀佢！
小琪兒到咗之後，我地就開始包餃子啦．由於我要入廚房預備滾水同醮料，見都係手板眼見功夫唧，係咁意講解咗幾句，就好放心咁入廚房做野．
點知．．．原來佢地係唔多識包餃子架！嗄！乜咁既，摺信封呀？好，又示範一隻俾佢地睇．跟住大家好高興咁繼續呢項工序，我就走去爆瑤柱絲，灼油菜，同淥餃子啦．
好快就有第一轉餃子食啦．
唔知邊個包既餃子，封口封得唔好，好幾隻都識笑既，ｄ餡漏晒出黎．第二轉既餃子，我索性成隻鑊上檯把啦．
五個人食咗五十幾只餃子，佢地四個飲晒成公升蘆薈蘋果汁．
鮮檸罌粟籽蛋糕變咗香橙雪芳蛋糕．
ｐｒｉ又賴呀媽唔記得同佢買檸檬喎！
切開都幾鬆軟，佢仲走去用手壓扁自己果舊，示範下舊蛋糕係會還原架．
然後，到軟糖上場，雖然我地冇用檸檬茶，又冇熊仔模具，個賣相係咪唔差呢？
可惜冇乜甜味，唔似食緊糖，似食緊一塊爽口既膠．
pri仲幻想呢件軟糖係寶石戒子黎．
九點幾，差唔多要走人啦，當我入咗洗手間之際，聽到外面有打爛玻璃既聲．跟住唔知邊個講：一陣May姨出黎就話我地架．．．．
哼哼．．．你地估邊個食野唔做野呢？
真係論盡啦，ｄ玻璃彈到四圍都係，又花咗ｄ時間去清理，然後先留返廚房個爛攤子俾雀屎善後，今次真係打搞晒咯！
一個二個陸逐分手，我係最後一個去搵巴士站既，離遠見到一架好似259D就黎開，雀屎話果架應該唔係我要搭既車，我清清楚楚見到龍門居三個字，應該冇錯架啦．晚上班次疏落，唔理三七廿一，向司機揮手，睇下佢啋唔啋我？嘩！真係好啦！佢真係等埋我喎，唔該晒你呀！
雀屎，好多謝你送我去搭車呀！
沒有留言:
張貼留言