老闆娘又要離開香港一段日子，老闆決定清晒佢放係雪櫃既急凍食品，全部拎晒返公司。我呢幾日既午餐大概可以食叮叮飯啦。
但係雜菜粒、青豆粒、燒火腿要加其他野煮咗先食。芝士通粉、意大利雲吞、千層麵就太重手，容乜易獨力應付唔到架，都係咪啦，掃晒返屋企至算。
呢幾片薄薄既火腿，要成六十幾蚊，我後來用咗黎炒蛋，Bibi不知食得幾開心．
晚上問Bibi想食咩？佢望下我帶返黎堆野，話一定唔係要食乾炒牛河啦。佢叫我叮三包意大利麵食喎，唔好啦，芝士咁重手，容乜易又肥又漏架。
我只叮咗一盒芝士通粉同一盒意大利雲吞。芝士通粉都幾香，冇想像中咁漏，而且d通粉亦好滑既，唔會一pad pad，兩個人合力食一盒通粉，再一人砌三隻茄醬意大利雲吞，都幾黏黏脷。意大利雲吞有大量茄蓉汁拌食，比較惹味，食幾只都唔算漏。再煮一罐字母湯，加多多雜菜粒粒，一人飲兩大碗，加返d纖維平衡下，心理上覺得健康d。
一睇ｄ鬼既口味，就知點解佢地會咁肥．我老闆就比較喜歡食東方食物同咖哩，我見佢好多時都係買沙律食既．加上我既監督，每日都會起碼食一個生果，週末又會行下山，所以都唔算肥．
沒有留言:
張貼留言