見到華姐整有味飯，等我都黎整返煲菜飯食下先。
材料：
瑤柱、冬菰、蝦乾、小棠菜、薑片、米
瑤柱、冬菰、蝦乾都要事先沖洗，浸軟。
呢度係四粒瑤柱
我用咗八隻幾大隻既冬菰
蝦乾冇數過，係咁上下得啦
瑤柱撕開（瑤柱水可以留返黎煮飯）
知唔知每粒瑤柱既邊位都有粒比較un既部分架？唔鍾意食，可以未浸之前，一早搣走佢，留返第日煲開湯先用埋佢又得。或者由得佢成片，掉埋入去煮，留返ｄ有“食力”人士搞掂佢。
冬菰渣出水，切粒，放少少糖及粟粉撈勻，咁ｄ冬菰就會滑ｄ架啦。（冬菰水亦可以用來煮飯）
蝦乾切粒（蝦乾水梗係可以用來煮飯啦）
我買咗有機小棠唐BB，洗淨，切碎（粗粗地切好咯喎，唔係就冇口感架啦）。
呢ｄ係有機薑，通常生得un豬ｄ既，所以比較細塊。有人問係咪有機薑好味ｄ，實在呢，就唔一定既。只係植物既根部，會吸收泥土ｄ東東儲埋架麻，食有機既，就會安全ｄ。我都唔一定堅持食有機既，不過屋企有咪用咯。
米洗淨後，放浸過瑤柱同蝦乾既水入去做煮飯水，覺得水份唔夠，就加冬菰水搭夠。記住喎，唔好加太多水呀，約為平日正常煮飯既份量，再少ｄ，事關ｄ材料（尤其係菜）係會有水份瀉出黎架。但係水預得太少，ｄ飯又硬，預得多咩，又一pad pad。各家既米受水程度都唔同，最好自己學下啦，經驗就係咁累積出黎既。
好啦，預好咗ｄ水之後，又要泌反ｄ水出黎備用喎。
先用少少油爆薑片
放入冬菰粒炒下
再放瑤柱絲同蝦乾粒，兜勻。贊少少酒，兜勻（記住呀，ｄ酒係灑去隻鑊度，唔係淋去ｄ食物度架，咁先香架）
掉埋ｄ菜入去，炒下，唔駛煮熟架，炒一陣就好收火啦
倒ｄ米入鑊，撈勻晒佢，係鑊度會比較易撈勻架。
拿，幾快勻循晒！
將所有東西放入煲
加返頭先泌出黎既米水，咁就可以放入飯煲煮啦。我地屋企已經唔用飯煲好耐架啦，我地係蒸飯食既，更原汁原味呀。
睇下，咁就有煲香噴噴，好味道既菜飯啦！有冇留意到我係冇放過鹽既呢？冇咁多調味，就可以適合一家大細食啦麻，大家可以隨個人喜好加豉油，添色添味既。但係唔加調味都ｏｋ架！事關ｄ材料都有味道既，若然你係食開重口味既，咁就係放水既時候加ｄ鹽啦。
祝大家吃得健康！
蒸飯小秘訣：洗好米，放好應放既洗米水，由得佢係個盅度浸半個鐘先拎去蒸，好快熟同蒸透架！如果整有味飯呢，係上面洗完米，加咗米水之後，咪由得佢浸下先咯，一陣先泌ｄ出黎黎就可以跟住ｄ步驟做啦．我呢度冇浸過ｄ米就煮既，就要蒸得耐ｄ架啦，即係起碼多十五分鐘．
沒有留言:
張貼留言