雀屎係佢既網誌度，介紹咗呢本書既中文版，推介俾大家睇．
既然原著係英文既，應該會原汁原味ｄ，我即管走去圖書館預約一本英文版啦．
呢本書，都算死咁重，我不厭其煩咁，每日拎出拎入，係早上果程車度睇．回程就睇唔到啦，早輪放工時份天色仲係好暗，村巴上既照明系統又係暗暗既，冇老花都睇唔到啦．好就好在呢本書無論睇到邊度停咗，再拎返起身睇都唔會話入唔到戲．
一班年青欖球員，自溫暖既國度出發到智利比賽，身穿單薄衣物，怎料遇到墜機事件，在零下四十度既氣溫下，他們是怎樣捱過這七十二日的呢？
作者又如何奇蹟地以能人所不能既情況下，只用簡單既裝備，攀過安第斯山脈最高峰，到山脈的另一邊尋求救援的呢？
原則上，呢本書都唔悶既，我連序同後記都撈埋，證明佢係一本唔錯既書黎．我ｄ英文程度呢，自小學開始就唔合格架啦，但睇呢本書都冇乜特別困難（唔通我ｄ英文真係進步咗好多？），只係得好少生字，但睇多幾睇都估到晒既，所以係唔駛拎住本字典黎查既．
睇完本書，開始有少少明白，點解ｄ鬼佬會咁熱衷欖球運動，宗教信仰係點樣根植入佢地既心靈深處．
呢兩幅相入面既排骨人，就係當年雪山墜機後既生還者，一個二個原本都係身裁健碩既欖球運動員黎，個個都係後生仔，經歷呢段日子後，死唔去既都已經變成行屍咁滯啦．
俾個心理測驗你玩下：呢幅相裏面既人，你覺得佢係合埋口定係度伸緊脷呢？（答案在此篇網誌底部）
係咁低溫既天氣下，缺乏食物，日子點過呢？我仲好記得作者講佢點樣食埋最後一粒花生m&n，第一日嗒晒外面層朱古力，第二日食半粒花生，第三日食埋餘下果半粒．最易得到既食物就係墜機事件中的死難者的屍體，如果佢地唔食人肉，就不能捱到獲救之日．比著係你，你食唔食呢？仲要係生食架！佢地初初都只係食ｄ大舊肉既部位，後來，連內臟都要食埋，因為營養高ｄ．．．
本書咁好，點都想屈Bibi睇下架啦．佢咁忙，鬼得閒啋我咩？好彩佢咁啱又要做閱讀報告，呢本書又夠厚，佢又懶得再搵其他書啦，就勉為其難鯁咗佢．其實Bibi好多時都借幾本書返黎，睇下邊本睇得入既，先用黎做閱讀報告既．就係咁，我成日睇埋佢借返黎既書，如果我覺得難頂，佢就唔駛睇啦．
心理測驗結果：
如果你覺得相中既後生仔係合埋嘴既，你一定係一個平日比較正經既人．
若然你覺得相中既後生仔係度伸緊脷既話，即係你好似我咁，都係傻傻地既，正所謂：癡癡呆呆，坐埋一檯，我同你就至夾啦！
其實講咁耐，都係同你地玩下架咋！依家ｄ細路真係易氹啦！
沒有留言:
張貼留言