呢ｄ算係賀年版merci ($18.90)(其實咁細粒，平日都有得賣，但多數成包得一個味)，我蠢到搵包睇到有三粒綠色既先買，因為係得呢粒先有果仁碎架咋！點知倒出黎，係好平均既。七款味道，每款三粒。
從前買袋庄雜錦東西，因為係隨機入袋既，都會有偏埋一邊既情況，試過成包某款得一粒咁大把。所以我通常會揀一包有多ｄ自己鍾意既款式先買既。
呢ｄ大條既，就係正常size啦，依家已經改咗少少包庄架啦，以前ｄ料係矜貴ｄ既．
呢隻朱古力，我中學已經開始食佢，果陣要好似大丸百貨公司咁上下地方先有得賣，其實冇乜特別，我俾佢既評分都係七十分咁上下，事關佢都係偏甜，滑度亦唔多夠，價錢亦較貴．
今年去大伯度拜年果陣，見到兩個姪女咁欣賞，咋一聲得返個膠袋，咪又整包俾Bibi食下咯。早輪天氣咁凍，食下朱古力增加熱量都好應該既。
有網友介紹呢款朱古力，話幾好味既，我成初八先去買，得返一款咋！
都好啦，又整包試下。
咬開，係雙層既。外皮係dark choco，滑度合格，雖然算係黑朱古力，仍屬偏甜。
內餡呢，係牛奶朱古力同脆餅碎既混合物。比外層更甜，滑度就一般啦。
想真實體驗佢既滋味，就要食得「生積」d，輕輕咬出個外殼，嗒咗先，話就話72%咋，冇乜苦味。個心呢，就要慢慢咬個頂，領略下d脆餅feel，然後先食埋個底。
總評分77，以咁既價錢：$19.90一包，有成300ｇ，即係10.6安士，算合理架啦。
原本約咗去風月堂食日式西餐既，但因為工作沒完沒了，六點幾大家都未能成行．
咁唔去到奧海城咁遠啦，改架步，係中環食算啦．
打去怡翠軒，話六點半既話要八點交檯喎．咁咪啦，又改去呢度：
好似改過ｄ格局，入門口既細檯有卡位．我地六個人，坐大堂．
開胃小吃，算比較認真，唔再只係潮州咸菜同花生．
黎到就多數會叫碟鵝片架啦，水準如一，肉質軟綿．
天白菰竹笙扒豆腐，嫰滑既豆腐條係事先炸過既，獻汁太杰．
家鄉煎藕餅，味道最濃，充滿膶腸既味，係炸既，唔係煎既，連墊底既藕片都係炸到脆卜卜既．
呢碟翡翠百合明蝦球，ｄ蝦冇味既．
三杯雞煲，普普通通啦．
漁香茄子煲，最正路啦，但都係個獻太杰．
我地仲叫咗白果芋泥，反沙芋，水晶包同埋紅棗糕做甜品．紅棗糕拎黎果陣係熱氣騰騰既，味道都唔錯，食到係一層層咁蒸出黎既，算滿意架啦．
又有小朋友送我DIY小禮物, 今年過年, 除咗食得既, 用得既禮物都有呀, 就當係情人節禮物啦!
你地話靚唔靚吖?
年初一，情人節，我地帶埋呢個蛋糕去嬸嬸度切，一齊慶祝．
返到公司就收到華姐既手作，夠晒應景，即刻掛好佢先！
佢手字，唔駛多講，我正朝著呢個目標進發，只係龜速ｄ唧，就黎得架啦，大家暫時都係要忍下我既墨寶！
攞膽曲奇，每年ｄ特別日子，久唔久都會收到，但每次收到都係咁開心，4MIX定8MIX都冇緊要啦，我地都係一樣食晒落肚既．我冇儲罐既習慣，掉咗又晒，有時都會監硬放ｄ野入去，叫做用得唔好晒．
金莎，如果收唔到，Bibi就唔覺得係過年架啦．佢間中都會lur我買，上次人地送手作俾我，入面有黑莎，佢不知幾開心．
其實藍罐曲奇，我地由細食到大，如果冇人送，我地都會買黎食架，所以收到一樣笑嘻嘻！
至於我自己呢，送禮俾親友，一定係揀自己鍾意食既，唔好食既，送俾人都無謂啦，我都係想收果家人可以好好享用既唧．
今年開年，比較特別，因為家族內的新成員第一次同大家拜年．呢個係我既姨甥孫，小Hayley已經十個半月大啦．你地估佢老豆點介紹我俾佢識呀：拿，呢個就係May姨啦，爸爸細個果陣，佢都待我不薄既．（乜話？不薄咋？簡直錫到你燶啦！）
大家仲記唔記得呢個大喊十呢？依家已經女大十八變啦！
團拜事必多野食，魚肚湯，一開波就俾大家飲晒，唔記得影添！
我今年為大家預備咗涼拌海蜇同酸薑．
魚生同壽司梗唔少得啦．
今次既沙律加咗腰果，爸爸話好好食．
三姨既豉油雞
大姨媽既鮑片燴菜心
煇舅母既東成西就
強舅母既蓮藕炆鴨
三姨既富裕生財
四姨媽既大展鴻圖
二姨媽既如意素齋
仲有兩個大批
甜品我帶咗兩個蛋糕：天使蛋糕
Tiramisu，好彩食晒唧！
當大家都閃晒之後，又有段小插曲發生係我兩個耆英家姐身上．
話說三姨叫大姨媽去買紙杯，大姨媽就買咗幾包勁大隻既膠杯返黎．
三姨：膠杯唔裝得熱野架！仲買到咁大隻．
大姨：我點知唧？又係人叫我買至貴既．呢ｄ十幾蚊一包架！
Bibi話見到三姨好似俾佢激到嘔血咁，我都明既，大姨媽咁史提拔，好心就咪叫佢買啦．我話：第日要買咩，就叫我去買啦．
我地屋企樓下商場既桃花, 年年都開得好靚, 可能個買手叻啦, 夾啱時候, 無論果年係暖定凍, 佢地都揀到棵靚靚仔仔既桃花, 擺係度大家睇既. 過年見到棵花開得咁靚, 都幾醒神架! 尤其係我行過維園花市, 見到人地果d花咁殘, 就更加覺得我地呢棵花靚啦.
多角度睇, 都係咁燦爛既, 而且花蕾都仲有好多, 起碼正日果幾日都仲會有d睇頭.
呢棵就放係平台既電梯大堂, 大棵好多, 但花朵就比較細, 舊年果棵呢, 就更靚, 開到十五都仲係好靚, 算難得架.
又睇下我地買既cheap cheap雞桃枝先
算係咁啦, d花又大又靚
我地冇奢望佢可以擺好耐, 擺到幾日, 都夠啦!
初一睇住佢咁靚, 覺得好超值呀!
