印仔九十一 - 兔來了

見到小牛蛋做了一個貓貓印章，覺得十分可愛，問她取了這系列的漫畫看看，立時愛上了．（可愛圖案可在此處尋：http://www.digitaland.net/data/creators/?M=261 ）

事不宜遲，立即動手做一個：

因為粗心大意，期間又有好幾個來電，所以雕得不好．仲唔成機賴地硬呀?

印出來，硬是覺得有什麼地方不對勁，啊！原來忘了為她塗胭脂呢！

化妝品的力量真大，只要輕輕一抹，兔兔立時精神百倍！

無怪女士們會心甘命抵，乖乖奉獻銀兩予化妝品公司咯．

爬蟲館新氣象

屯門市填公園，自從裝修以後，我都只係去過一次．今次再去，又多咗好多新住客．

依家佔最多數既爬蟲就係蜥蝪

甚麼石龍子，大壁虎，刺尾蜥，變色龍等等

得閒去開，真係要睇下

呢條既保護色真係夠勁

大懶蛇黎啦！

仲有好幾隻龜

呢兩隻係鎮館之寶，咁鬼大隻，我諗俾我騎住，佢地都走得郁呀！

來自英倫的小熊

英國有咩手信好買吖？食黎食去又咪果ｄ好鬼甜既糖同茶包咯．．．仲有蘇格蘭出名既Shortbread，成份：30%係牛油，聽見都驚呀！

但今次呢個同事帶返黎既，總叫有個突破，你地睇下：

立體既熊仔罐

打開有兩包熊仔Shortbread，相比起長方柱體既original，呢款賣相就可愛得多啦！

小小一隻，又唔太厚，好似曲奇咁上下既唧．

佢仲識同大家打招呼添：Hi!

罐邊有少少凹咗呀！個盒咁靚，冇人要就晒啦．

經我用手修正之後，已經好好多啦，而且亦冇影響到佢既開合，終於有同事肯收養佢．

我的新袋袋

好野！又有禮物收．係剛剛收到架咋，新鮮滾熱辣！

見唔見到呢？係併貼袋呀！

仲有埋我個名添．

同事問我係咪熨畫黎，梗唔係啦．

好鍾意你地三母女啊！長頸鹿很可愛．

我會唔會用？梗係會啦！今日率先用佢黎護送呢幾個生果返屋企．

以後，佢就係我用黎裝銀包同click瀝卡啦野既食飯袋啦．

爸爸勇救小朋友 - PG家長指引

呢隻假野似唔似懞面超人呢？

可以擺出唔同甫士既，千手觀音咁既造型，仲曉同你笑添！

做得夠精細掛？

我講造物主咋！

其實．．．．佢係爸爸係圖書館發現既．

你地都知我地要戴大眼仔先睇到野架啦，爸爸見有隻野係地下度爬下，爬下，原本就唔理佢架啦，佢根本就睇唔到佢係乜東東黎．但見到佢係咁多人既腳邊行黎行去，遲早俾人踐扁啦！

於是，佢就用個袋仔捉咗佢，諗住走果陣，放返佢出去．

我咁啱冇戴隱形眼鏡，所以一眼就見到佢都幾靚仔喎，咪帶埋佢去shopping，等我地返到屋企影埋相，先同佢say good-bye咯．

都服左爸爸啦，其實呢個小朋友，得咁大架咋！

佢應該唔係甲蟲掛，我就話佢似蝽象啦．

印仔九十 - 快高長大

五月廿三日，係爸爸既生日，亦都係呢個同佢同年同月同日兼差唔多時辰出世既牛B既生日！

我想做一個印章俾佢做紀念，揀咗快高長大．因為佢實在太un豬啦．．．望落去仲un過Bibi細個果陣，而且冇厘精神既，咁點得架？

呢個章，上個月就做好啦，所以係好早期既印章黎．係架，爭一個月既磨練，就爭好遠架啦．

快高長大喎．．．真係唔係人人睇得明架，如果唔解畫就真係有ｄclick啦．

好鍾意印係紙巾既效果，好似專屬餐紙咁．

你地又睇下呢個印章！知唔知衰咩呀？

睇到未呀？印出黎俾你地睇清楚ｄ啦：

我寫咗長大快高呀！陰功咯．．．雕完先知自己衰咗呀．

起草果陣唔覺架，都係自己大懵咯，白費心機，仲晒咗一忽好擦膠添．咁唯有從頭黎過，於是，我一共做咗兩個呢ｄ印呀，真係夠晒蝦碌啦！

好啦，萬事俱備，這就是我送給牛B的小禮物了，你要生生性性，孝順父母啊！

牛B，其實你都幾靚仔下架，快ｄ長返ｄ肉肉，等我地可以安心咬啖至得架！

至於我地爸爸呢，我都做咗一個玉壐俾佢．

唔駛解話啦，你地咁聰明，應該識睇啦！

爭ｄ走投無路的決擇

我係一個日日都要睇書既人黎，咁啱週末掛住玩，去咗街．跟住第日去圖書館又趕頭趕命，將ｄ書還晒又冇時間入返ｄ新貨．缺糧添！

星期一就拎咗Bibi一本迷你老夫子頂住早上既車程先，放工又趕車，冇帶到其他讀物走．到咗星期二，唯有打爸爸主意啦，係佢既專區度搵料．果度大部份係ｄ宗教書，想悶瓜我咩！好彩，都叫做搵到呢本孔子傳既漫畫．

其實我對呢位萬世師表一向都冇乜認識既，除咗聽過下佢幾位子弟既名，同大家成日講既金句之外，就咩都唔知啦．睇過呢本漫畫之後，咁多少都知道下佢既生平事跡既．

又到放工，今次我醒啦，記得拎書，拆埋手頭最後一套金庸小說，得兩集既飛狐外傳，要慳ｄ睇啦．．．事關跟住既週末都有街去，鬼得閒去借書咩！

老實講，都未去到走投無路既，至多拎埋訂閱又唔得閒睇，放埋一邊既讀者文摘存貨出黎，又或者將一早儲備，從報章上剪出黎既篇章攞返出黎，都可以頂到兩個星期架！