一波未平，一波又起，爸爸有朝收工，又捉咗一隻甲蟲乸返黎！(如果你地仲未睇過之前既慘痛經歷既話，請參照：爸爸：Bibi真係我既囡囡黎架！PG家長指引及爸爸：Bibi真係我既囡囡黎架！後記：PG家長指引)
點分佢係雌性？佢大咗肚架！
明顯地，佢同屋企原有既品種好唔同，大隻好多，顏色亦有分別，佢係啡色架．
俾佢係度住兩日，個身又肥咗ｄｄ添．
睇下，佢個身幾咁得人驚呀，如果反轉佢個身，仲可以清清楚楚睇到佢肚入面既蛋蛋添！不過，因為太驚嚇，驚嚇親部份細膽既小朋友，所以就唔post出黎啦．
大膽既小朋友如果想睇既話，可以私人留言，我就貼俾你睇啦！
咁到底呢隻又係咩品種呢？我去過圖書館搵資料，佢好大機會係獨角仙黎，呢張相同上面果隻，真係有九成似，連ｄ腋下既毛都清清楚楚架．
再睇下書入面既介紹：
睇下，真係冇講錯架！
至於公呢，佢地先有角既．
其實我地以前就係捉過類似既，但因為唔知佢鍾意食乜，爸爸仲倒咗ｄ未開稀既蜜糖佢歎，終於佢頂唔順，情願死都唔俾爸爸養喎！
我知道呢ｄ甲蟲賣到好貴，但真係唔想佢地係屋企，要養到ｄ蛋孵出幼蟲，再由幼蟲變成蟲要成年咁長架，期間又要悉心栽培佢地，先可以愉快成長既．隻雌甲蟲個肚又鬼咁多蛋蛋，佢一開枝散葉既話，我就真係唔預返十間八間豪宅過佢，都藏唔晒呢隻阿嬌呀！
或者因為我ｄ黑白天鵝功夠勁掛，爸爸終於都放返佢地．佢一放入山邊既草叢腐葉堆咋，佢地就咋咋臨搵窿捐啦，好似突然人間蒸發咁，爸爸連最後一個shot都影唔到呀！
爸爸：我地係咪放走咗成萬蚊呢？
沒有留言:
張貼留言