剪報

我成日儲埋d剪報，諗住去到冇書睇既時候就拎黎頂住．除咗中文報紙ｄ雜文外，我都會剪下ｄ英文報紙既．順便搵下有咩啱Bibi睇既current issues，又望下有咩自己啱睇既剪低佢．

除咗新聞外，我最喜歡留返Post Magazine既Long-distance Call同Season．前者係講各國華人係異地謀生及如何適應環境，後者就係我既興趣之一，講時鮮食材既．

係呢ｄ食物資料裏面，我都學唔少生字同常識架．但係，睇還睇，咪信晒作者寫既野，好多時佢地都係知少少，扮代表既．

尤其係我話齋果ｄ呃鬼佬野，好似呢篇講蘿蔔既，就順帶提埋蘿蔔糕既製法，當正自己係專家咁，初初都有文有路架，睇睇下，見到佢居然話蘿蔔糕係放叉燒架喎，爭ｄ笑死我．

有時作者本身未必對烹飪有研究，做咗資料搜集後，或者會估估下咁寫出黎都未定．

學語文係應該揀自己鍾意既東西去睇既，呢ｄ冇咁正經八百既雜文就啱我架啦，短短地，睇過就了，唔駛點用腦去剖析問題．就係因為自己程度差，所以我都睇唔少細路仔英文書架，貪佢地易睇咯(其實兒童書不知幾好睇, 有d冷門d既童話故事簡連我都未聽過呀, 我大大話話都睇過數以千計既兒童刊物架)，而且又可以知小朋友諗緊乜，將頻道調返去佢地既年齡層，方便溝通吖麻．