呢款Ritter Sport既黑朱古力都唔錯架，有原粒榛子．係呀，我鍾意多果仁架！
我通常唔會揀夏威夷果仁，是關夏威夷果仁都幾易變壞，或者我既味覺特別發達啦，真係食得出，咁就冇癮啦．好既果仁係應該食到佢本身既甜味既，所以無論核桃，杏仁，榛子，鮑魚花生，腰果，碧根果仁等，我都鍾意揀返原味既，唔會俾調味品影響我對佢既評價麻．原味連殼未經焗製既雜果仁，通常近聖誕係大間既超市可以買到．
呢款橙味ｍ＆ｍ出咗ｎ咁耐架啦，但一路都冇意欲買喎．有朝入咗屈人寺，見佢只係五蚊包，是但啦，整包啦．
裏面全部都係橙色同白色既，嗒入口，勁似積及朱古力橙餅既味呀！就當童年回憶啦.
呢款香蕉仔朱古力，出咗好多年，我由佢既第一代食到依家．老實講，咁耐以來都冇乜分別．佢賣既只係卓頭，估到少年人既心理，貪新鮮，成日改一改佢既版本．
初初就係加咗隻深色ｄ既香蕉仔，等大家倒出黎食果陣可以順便占卜云云．後來又出埋未熟既香蕉（青色既），今次呢一版就出藍色，叫Tropical熱帶香蕉喎．．．
我由佢五六蚊食到依家九個幾，其實佢既味道都唔差既．因為Bibi屬猴，所以佢對香蕉有特別好感．朋友同我一齊逛零食店，問買咩俾佢食好．我就要咗呢樣，老實講，果次去零食鋪，我都搵唔到咩特別野，唯一值得買既只係果款四方柱體既特濃牛奶糖，佢出咗黑芝麻加鹽味，稍為特別啦，值得試．
朋友買咗俾Bibi，點知佢只係食剩一粒俾我，真係橋呀，竟然係特別版，藍色呀！佢唔係專登留返藍色俾我既，只係冇節制咁食到得返一粒先記得我未有份食，叫做懸崖勒馬架啦．．．．
算啦，反正我都冇乜quota啦，食一粒當做食過就了啦．
沒有留言:
張貼留言