呢班小朋友大得好快，轉眼間就有毛有翼啦！
（如果你冇睇到之前發生既野，可以睇返呢篇既：回歸寶寶 - 我家的新租客）
踏入第六日，爪仔都睇得清清楚楚啦．
咁阿四點呢？影都未有！
去到呢個時期，雀BB係會分辨到父母既訊號既，如果佢地示警，呢幾個小朋友就會乖乖伏低架啦．．．（至於Bibi爸爸既聲音呢，雀B就實行啋佢都傻呀！）
呢隻係阿三，佢ｄ毛冇咁長，明顯地係冇兩個大佬咁壯既．
到咗呢個階段，就算阿四出到世，實在太危險啦．．．
事關雀仔BB，好似見風就大咁每一日都會大好多，去到第七日，毛仔都伸埋出黎啦．
若然阿四係呢個情況下出世，真係凶多吉少呀！
唔壓死都焗死啦，你地話係咪？
所以，爸爸決定都係做代母，拎咗阿四出黎，自己孵！
拿，粒蛋咁丁丁，初生雀B有幾大，大家都想像到啦，俾上面ｄ大牛龜泰山壓頂喎．．．．．
仲有剩既？
呢個就係阿四既新居啦，爸爸用黎裝住ｄ獨角仙影相既玻璃兜，墊咗環保紙同隔棉，再放入自製既保溫箱（一個裝咗燈膽既塑膠衣箱）．爸爸仲會放埋溫度計同濕度計係入面既，監測住入面既溫／濕度．
如果粒蛋實在係冇授精既，咁就一定孵唔出．但若然係因為被人疏忽照顧而未能出世呢，咁好快就會同大家見面架啦！
沒有留言:
張貼留言