冷飯變綿粥

六點半就醒咗，不如起身做ｄ有意義既工作啦．打開雪櫃，有ｄ冷飯係度，不如用黎煲粥啦．

為咗令醜女大翻身，我為佢加咗好多材料：蝦乾，瑤柱，咸豬展，咸蛋

因為冇心理準備，所以除咗雪櫃果舊咸豬展係事先醃既，其餘都係即用既，我連果皮都偷懶唔落啦．

放水入煲，將兩粒瑤柱求其搣碎，掉入煲內，蝦乾沖沖就掉埋入去，豬展亦都係洗洗佢就算（冇出到水），倒埋ｄ冷飯入去，就煮架啦．

水滾之後，煮多五分鐘，放回真空煲入面，上床繼續歎剪報．半小時後回頭，將煲粥翻熱，撈起豬展．順手洗隻咸蛋，原隻放入煲內，用慢火煮．

將豬展剪碎

出廳打一陣機，回頭撈起隻咸蛋，用小匙整碎備用．

煮多幾個字，ｄ粥已經夠綿，掉埋ｄ肉入去．

蝦乾同瑤柱都出咗味

放ｄ巖鹽調味

畢一碗粥，放少少咸蛋上面．

一碗綿滑靚粥就整好架啦，鬼知你係用冷飯煮架咩？

Bibi，假日早餐有呢碗野食，包含咗媽媽無限既愛架！