遠行

14/3，又係放例假。今次要去到馬鞍山咁遠，拎住MANDY個地址，話係鑽石山地鐵出咗，坐85M巴士就去到咯喎。咁好啦，我睇過地圖，都應該摸到既，都係時候學下自立啦。

約咗十一點，出中環做少少野，九點半先出發都未遲。點知去到鑽石山都只係十點鬆D，早到太多都唔係咁好既，就上荷李活廣場行個圈啦。商鋪九成未開，靜蠅蠅既。見到311既祈福牆，可惜時間太早，未開放住。



有店鋪正在裝修，非常嘈吵，但我照坐係廣場入面既長椅度，扮長者睇陣書先。十點半先再去坐車都未遲。

沿途風景都唔錯



學校林立。

落車後，我好順利摸上門，時間啱啱好。

一坐落，主人家就好熱情咁任我選是日玩樂項目。真係俾佢D印仔收藏嚇親，自從我曉得"自食其力"後，都冇乜需要買印仔咯。
 
我地等埋嫻子黎，就開工玩啦。一於佢地兩個做口金，我就玩併貼。

我乜都鍾意細既，大大件既盒呀、架呀、鏡呀都唔啱我心水，我初初選了迷你木衣夾。但後來發現實在太難找到合適圖案，又見到一個巨型衣夾係度，就用佢啦，應該幾好既。

第一次掂呢D東東，唔可以一步登天架，就用塊心心木來試下先。

將底部及側邊油上塑膠彩，再係面頭油白色打底，先貼上餐紙。都幾靚吖，雖然仲未加光油，都唔錯架啦。

見到有一忽剩餘物資，度下先。咦，都夠用喎。

D牛牛好得意

好有童趣

貼好之後就係咁啦:

係咪唔錯呀? 以上併貼物品都要帶返屋企加工至得。

呢個係師奶之寶，掛勾。

出術用貼紙粘住打底就算，連顏色都慳返唔駛油。

加返張餐紙先，呢個要留低做水晶面，唔可以帶你走住啦。

主人家仲借埋呢本天書同工具我返去研究下，希望我睇得明啦。

 

呢幾粒實物，我影幅相就夠啦。

 

長者中心既作品，認真唔錯喎!

 

佢咁多寶物，梗有送D俾我玩啦，我貪心打劫咗一D閃石，仲有好實用既紙頭。

 

呢疊正呀，牛油紙! 唔駛成日搵環保紙黎起稿啦。

 

時候唔早啦，六點七個過D啦，唔好阻人地煮飯啦，我就閃啦。

到果陣，我先知 ...... 我冇諗過回程點走架喎 ......

歷史真係重演，回到我升中一第一日返學，放學果陣以為去返早上落車既車站等車返屋企就得架啦 .......

突然間醒起，真係一額汗 ...... 雖然我有開口問人地，走果陣係邊度上車。但係 ..... 我都唔認得路既，咁落車點算呀? 你估電車呀? 落車就係上車果條街呀?

等咗幾個字先有車，又坐正架冇報站牌既巴士，仲要去到半路架車駛到唔知咩站，司機叫所有人落車，要轉去隔離上架唔知咩X車度，話都一樣經黃大仙同鑽石山喎。一開車唧，個報站牌即閃黃大仙龍Ｘ樓喎。嗄 ..... 咁即係咩呀?

我: 請問搭地鐵係咪呢度落呀? (冇乘客識答我?又或者佢地唔信我咁低能仔?)

司機：地鐵站？下個站啦。

搵到黃大仙地鐵站啦，又見到有間麵包店，師奶濕平又發作，買個包先(呢間既雪芳蛋糕超難食)！跟住都冇行商場啦，入到地鐵。又想改變主意坐巴士返屋企，話晒都唔駛再轉車吖麻。但係，邊個出口至啱呢？打電話求救先。

成功出咗路面，又搵到個車站啦，點知又等咗幾個字先有車喎。上到車，原來架車連樓梯都坐滿人啦。諗住行入Ｄ，企係度睇下書都好吖，搵個光Ｄ既位置先。

點知，連本書都未拎到出黎，我身邊位伯伯已經按鐘要落車啦，有阿伯讓座，Ｄ後生又企到咁遠，實唔會黎同我爭位坐既。所以我只係企咗一個站就有得坐啦，一路睇書睇到返屯門。真係不枉我帶住本咁重既書出出入入呀！

返到屋企九點啦，平安到達，馬鞍山歷奇之旅完成。