鮮茄豬肉餃

我覺得用蕃茄包餃子真係好方便，味道亦夠清新，值得推介架。

專登去超市買肉，點知鮮肉檔俾D地膽師奶盤踞住，真係唔夠佢地黎。但我都要買豬展、豬尾骨煲湯架，唯有靜心等待佢地買完野，有虛位先攝入去啦。

好不容易買到上述兩樣，但點解唔見有碎肉賣既? 唔通要自己夾一舊俾人處理? 見到一包梅頭豬扒，唔錯喎，有少少肥肉，而且肉亦唔多韌既，就買起佢啦! 阿姐好好人，幫我洗妥先拎去搞碎，慳返唔少功夫。



我先將生抽、糖、鹽同胡椒粉放入大碗度，撈勻先醃肉既。

撈勻之後，加少少生粉再撈下，再加少少油撈勻，就可以包起放入雪櫃架啦。

我喜歡用薄既圓餃皮(四兩都有四十多塊皮)，但今次買開果檔賣晒，唯有去第二檔厚D都要啦。



蕃茄洗淨切粒，用蕃茄有度好，就係可以睇住份量黎切，唔夠先再切多隻出黎用都得。唔好切得太大粒，好易督穿餃皮。(唔怕D餡太濕咩? 唔怕，如果你係即包即煮，係唔緊要架。)



唔需要專登將肉同蕃茄撈埋架，放少少肉係餃皮中間



再放蕃茄粒就得架啦。



用清水沾濕一半餃皮邊



覆起粘合，係咁意好似蔵姑娘D餃子咁，用手指公係兩邊壓一壓，等D空氣走減D，咁煮起黎就冇咁易因為空氣膨漲而谷穿隻餃子啦。



再將兩邊角位濕少少水疊埋即可。



記住喎，水滾放餃子，滾起到D泡去到煲邊咁滯，就加半碗凍水降溫，咁做D餃皮會彈牙D架。(記住呀, 我呢度係講緊淥一個人既份量咋, 如果你大煲淥二三十粒既, 就梗係要放多d水啦. 到時降溫就要加成碗水架啦. )如是者等佢再滾起就再加凍水，重複多三次，餃子就應該熟啦。驚唔熟? 咁你滾多次咯! (記住:煮果陣千其咪加蓋呀!)

若然係用黎帶飯既，翻叮淥好咗既餃子，再加D湯入去就得啦。咁整D皮就唔會因浸水太耐而發漲，食果陣仲係彈牙架。



其實整餃子有各種餡料變化，每家媽媽都有佢地自己既手勢。有D講究既就連餃皮都要自己親手搓，我就係D假日媽媽黎，所以都係俾幾蚊人洗，買現成餃皮算啦。