可疑的白熊咖哩

我都算係一個幾出名既試毒劑，大家一齊出去食飯，有咩依郁，我一定第一個有反應。

呢一日，我去到吉之島超市外既白熊咖哩，晚餐係包埋飲品同雪糕既。

門口既海報，仲好似有火鍋食，我又真係想試下喎。

咁一家三口就入咗去食啦。檯面調味架既辣椒油都幾得意，但我冇用過。我地三個都點咗味噌湯，嘩~~!滾熱辣既，當堂信心大增。

Bibi既雜菌煙肉咖哩奄列蛋飯，呢款望落去都正常既。

芝士豚肉扒咖哩飯，爸爸見到眼突突，一大個波咁，獅子頭呀? 我試過一啖仔飯，想試下D咖哩咩味。

唔~~，只係普通既日式咖哩，冇咩特別，但D飯一D都唔熱。

跟住我既豚肉煱都黎啦，嗄!! 乜唔係一路淥住食架咩? 好失望，但煲野都係熱既，味道唔會太咸，但我果碗飯都只係暖既。

最後，送上雪糕，呢樣最正常，雪糕係溫度保持得好好既，冇任何溶過然後再雪返既跡象。

檯上既水有可疑，我見其中一杯係唔清既，所以我一啖都冇飲。我埋單之後幾分鐘，就肚仔作怪啦，立即要去方便一下。

我當然知係咩一回事啦，一定係食咗有問題既食物。到底係邊樣野有問題呢? 暫時我會將呢間店列入可疑名單，如非必要，我係唔會再幫襯架啦。

行返出商場，見到呢D可愛聖誕裝置。

咁就同佢地拍幾幅相啦。

呢D裝置，係芝麻羔既朋友既作品，晚間唔多人，所以可以影到冇乜閒人既相。

大家入開屯門逛既，就同佢地拍返幅相留念啦。