早餐@雲貴軒

印象中都食過呢間連鎖店好幾回，冇咩特別。今次黎食早餐，就真係第一次。

總覺得早餐款式度度都係咁上下，大路野。想留到客，一係就杯奶茶正過人，一係就食物有返咁上下耍家。

而我呢，要求好簡單: d野夠熱係首要條件。

我要咗蜜糖雞扒、火腿煎蛋配牛油香草脆豬包，$30。塊雞扒..... 抵得佢吖! 竟然啖啖都係脆卜卜，仲唔係乾曾曾既。脆豬包係冇可能唔好食既，煎蛋同火腿都係普通野，下次咪點火腿。

跟餐既蕃茄雜菜米，熱辣辣，讚! 不過就咁畢D茄蓉入去，有少少失望。

另一個set，$27。火腿庵列茄汁豆多士、火腿通。本來碗通粉加兩條菜好抵讚既，都係果句，有得揀，咪揀火腿。

仲有: 我嚴重警告大家，千其咪要通粉，粉質堅難食!

以我多年飲奶茶經驗，唔得咯! 但未至於難飲既。

會唔會再幫襯? 會喎! 只要大家識得點野食就得啦，記住點米粉好過點通粉，唔好配火腿，揀其他款式就得啦。

我地食食下，人地都轉餐牌，做午市啦，咁我就順手影埋俾大家睇下。

我最怕冇靈魂既咖哩架啦，餸還餸，跟住畢汁係面既，no good。

蝦醬豬扒? 好似幾得咁喎，但又配肉燥，會唔會太咸呢?

小鍋米線要卅幾蚊，仲得一款餸，又孤寒咗d，咁佢送埋飲品，咁又唔算貴。

紅薯粉我食過啦，冇咩新奇，所以唔會因為好奇再點。

但佢又出咗熱拌紅薯粉，我又想試下啦。

佢既蕃茄湯都唔係真蕃茄湯黎既，只係加匙蕃茄蓉就算，所以唔好信呢D圖片。

係呢d地方，我唔會預d餃子會有幾出色，所以冇興趣試。

以前我成日叫Bibi返學放飯，夏天唔好叫肉燥，驚易滋生細菌，因為佢唔會成日煮住滾住。

餐飲可加錢轉懷舊特飲，咸柑桔七喜既話，係屋企整都得啦。