團購泰菜四人餐@ Life

買咗一個團購泰國菜四人餐，約埋幾個朋友13/3齊齊享用。

單單睇佢既介紹，有咁多樣食物，睇黎真係唔錯喎。

我地冇人飲酒，所以全部都係飲橙汁。

泰式生蝦我係唔敢食既，所以就由大家幫我食埋佢啦。賣相都新鮮，每隻蝦上面都有塊生蒜同辣椒，點埋個汁，都幾好味既。

小食併盆，有蝦餅，香葉包雞，春卷，咖哩角，薯角

香葉包雞，好入味，原本冇打算影既，食咗幾啖，真係好食，所以舊野細晒，都影俾大家睇下。

泰式鳳爪沙律，食果陣真係要小心，我地都唔係幾受得辣，所以只挑了鳳爪來吃，真係浪費晒其餘既配菜。其實唔小心咬到粒辣椒籽，已經好辣，所以都唔敢真係去食果D生洋蔥同辣椒以及香菜咯。

生菜包，份量相當，佢一D都唔孤寒，俾咗好多塊菜葉我地，個肉碎餡真係幾惹味。

燒豬頸肉，普普通通，呢樣野好少會唔好食既，略乾咗D。

我雖然唔食牛，但呢碟燒牛肉都幾靚，份量亦足，我地得兩個人食牛肉，所以就由佢地包底，見到佢地一人都要食好幾塊，肉質都唔錯咁款，仲有肉汁既。

呢半隻燒雞，因為係我地食到幾飽下先上場，咁啱我身上有餐盒，所以我打包咗走。第二日午餐係公司叮返黎食，真係好味啦!

泰式炒飯，唔油膩，味道適中，飯粒全部都係散開一粒粒既。

炒泰式金邊粉，材料好足，你地都睇到冇乜反光，即係都唔油既。幾好食架，但要少心唔好撈埋碟邊果D辣椒粉。

生蝦，蝦餅，香葉包雞，春卷，咖哩角，薯角，燒豬頸肉，燒雞，燒牛肉，泰式炒飯，炒金邊粉，生菜包，泰式鳳爪沙律，四杯橙汁。咁既陣容，你地又估下幾錢?

係HK$238，仲係包咗加一添架啦! 

你冇眼花，即係HK$60一位都唔駛呀!

係咪超值呢? 我傳D相俾朋友睇既時候，佢地以為係$238，仲以為再要加一呀。

D食物質素唔錯，味道亦標準，我地大部份食既野都可以拎黎送酒。約人飲野肚空空都可以叫多少野食填肚，唔駛四維去搵食。但係食物要在晚上七時半後先開始提供，而星期日係冇野食架!

呢間野其實係一間新開既酒吧黎，所以入面係好黑既。佐敦站D出口，轉左入柯士甸道120號，廣業大廈1/F。由大廈旁既樓梯上，見到大廈入口再隔離既鋪位就係啦。