煮個素菜拜山去

今次煮素菜孝敬嫲嫲，主打想用竹笙，呢D竹笙係人地送既，品質相當高，我係警犬托世既，一D都聞唔到化學成份，好天然，無添加，浸起果陣仲好清香添。

呢D係一口花菰，我預先浸定，第二朝起身煮。

好彩我之前果晚已經處理咗D竹笙，如果早上先黎洗洗切切就太趕啦。(網狀既菰傘我切走咗，留返黎煮第樣。)

第二朝起身，搾出冬菰既水份。留起D冬菰水備用，加少少糖同粟粉去撈一撈D冬菰。

用薑片同少少油起鑊，放冬菰入去炒下，贊少少酒，再翻炒。

將竹笙放入去兜炒，加埋之前D浸冬菰既水。加少少素蠔油或者蠔油，唔喜歡呢D添加野，可以唔放。轉細火，加蓋炆煮一陣。

呢D係之前果日係泰國食品節買既粟米仔。

用滾水灼一灼就撈起備用。

又係泰國食品節買既秋葵



其實個蒂都食得既，尤其呢D比較嫰既，但為咗賣相好D，都係切走佢啦。

一樣要用水灼一灼隔水備用。

呢個時候D冬菰炆竹笙差不多啦，可以放少少鹽調味。

跟手加埋D粟米仔入去兜炒。

再加埋D秋葵，兜幾下。

為咗靚仔D，我都放咗幾粒係熱水度泡咗十幾秒既蕃茄仔入去兜下。

咁就可以上碟啦。

粟米仔同秋葵都保持到脆口，清新可喜，拜完山，攤凍咗一樣咁好食。

爸爸話: 其實盒齋都冇乜人哮架啦，買咪得咯!

我話: 我係煮黎俾嫲嫲享用既，所以我唔駛理碟野有冇人哮既。

好彩最後盒素菜都俾大家食晒唧!