34th Anniversary - 結婚卅四週年慶

五月份是嬸嬸一家的喜慶月，佢地結婚週年紀念、阿女生日、阿仔生日、阿仔結婚、母親節等等。真係時時都咁高興!

數數手指，今年佢地都應該結婚三十四週年啦，等我整返個新款蛋糕賀一賀佢先。

用咗成晚做咗一批士多啤梨味玫瑰糖花，預多少少，我驚唔夠數，到時就煩啦。

預先做好餅底，風乾兩日，再粘上糖片圍邊。

大家都知我做既蛋糕比較細，所以單單粘呢d糖片，都要搞一輪。

雖然歪歪地

我諗佢都唔介意既

跟住就要種花啦，先種近邊位果一圈。

再一路種到中間為止，因為每朵玫瑰都係人手做，基本上冇一朵係同一樣子既。

再加埋我特製既朱古力牌

第二朝起身，望下個蛋糕。咦，係喎，人地D真野會加條絲帶架喎。咁好啦，我畫完蛇，又學人添下足咁啦。

我都算叻啦，都粘到條哎吔絲帶四四正正。今次我用薰衣草糖皮去做。

蝴蝶結都叫做打到架啦，第一次做，係咁上下啦。

俾埋側邊大家睇，冇花冇假。

順手係背脊簽返個大名，咁就完成九成九啦。

油埋保護啫喱液，就大功告成啦! 加係人地正式既結婚蛋糕catalog度都唔失禮。

我又諗到條屎橋，就係等嬸嬸早上洗完晒所有杯之後，可以安安樂樂坐底抖抖果陣，我就叫門神俏嬌娃打電話入去，叫佢出黎收花，等佢出到黎先知原來係件咁野!

我想告訴你: 其實大家有多愛你!

祝你地週年愉快，順便祝埋阿女生日快樂，33年前，阿女識得揀呢日出世，爸爸想唔記得送禮物俾你地兩個都唔得啦!雖然今年乖女第三度腹大便便，唔方便返黎同你地兩老慶祝，一於Skype見啦!

P.S. 如果我做呢D咁既蛋糕出黎義賣(一切款項撥捐兒童癌病基金)，我諗圓形玫瑰蛋糕賣$200，心形既要賣$300，先可以維持到最低工資，你地估有冇人幫襯吖拿?