Wedding Cake for Phyllis & Damian (結婚蛋糕)

都好耐冇做過蛋糕啦，今次重出江湖，梗係要試下新點子啦。

先做咗一個銀色既結婚牌

整完之後，又覺得唔夠大方，事關我有D大既長方盒，今次想試下用佢黎放蛋糕，咁就要做個大蛋糕啦。

單單服侍呢D字，都要搞足一日。

底底面面乾透之後，仲要加多層光油保護。

油完光油，又要再等到佢地完全乾透先可以用。我有大把時間，因為一路都諗唔到點做先好，所以一路都冇MOOD做。

終於都的起心肝開工啦，先做個心形蛋糕，加咗兩朵粉紫忌廉玫瑰同莓子朱古力，再加埋個結婚牌，平日就咁都已經可以出街架啦。

今次我試新野，學人畫花。

係咁意啦

點幾下，就係花仔啦。呢隻紫色，係同我D字一樣色既。

要做底層啦，因為要就返個盒既高度，唔可以太厚啦。要薄D。我仲懶醒，整定張紙，諗住要黎度尺寸。

呢個時候，我先發現我係冇工具可以切割既，事關個蛋糕會太長。後尾係就係切到個長方形啦，但第一刀就唔記得縮手，有幾個指甲痕添!

逐粒字母粘上去

再係下層既蛋糕邊描花，又係衰在唔熟手，一描就描前面，蠢!

種到D花密得滯，都唔緊要既，爸爸係一邊就依依哦哦，話我掛住玩呢D野，唔理佢喎。

貼D心心牌遮醜。

係背後簽返個名先! 我終於都用到我D朱古力牌啦。

我預計係咁樣放入盒既，等個蛋糕乾透，再加多層光油就大功告成啦。

加埋張心心底紙，呢個就係最後完成既版本啦。放到大一大咁俾你地睇下又點話吖。靚唔靚呢?

雖然我做野唔夠完美，又懶散，成日未逼到埋身都唔願做。但係我樂意試新招，將幾種手作元素cross-over，希望耐不耐都會有新野俾大家睇下。

呢位新娘子應該收過我送俾佢既卜頭蛋糕既，繼結婚蛋糕之後，希望好快就要勞煩我同佢設計個BB蛋糕啦!

祝你早生貴子，到時請大家食豬腳薑!