我和反斗車王有個約會＠公仔飯斗教室

同另一對母子組團，一齊黎呢度進行親子活動。

加太老師一見到Bibi，就話: 女仔黎喎，點解會揀反斗車王架?

原本配菜有日式漢堡扒既，因為我唔食牛肉，就打算改日式咖哩，但後尾又變成反斗車王意粉啦。

雞尾腸、獅子狗魚卷、蟹柳、紫菜、雜豆、芝士、沙律醬、吞拿魚、雞蛋等等，就係用黎扮靚架啦。

今次會做一份車車三文治、同車車飯盒。

首先做麥包三文治，我隻大板牙夠晒大隻。

車頭燈同眼我都要同人地唔同，所以冇跟足原著。包包既餡既吞拿魚碎蛋黎。



呢兩架車車，就係我同Bibi各自做出黎架啦。

每架車都有自己風格，朋友剪壞咗塊包，好彩我夠慳家，未用既部份可以俾佢再黎過。

跟住做車車飯糰，用保鮮紙包好舊飯，定型。外圍既紅色其實係蟹柳黎既。

先將鋪咗蟹柳既飯糰放入盒，用芝士、紫菜、青瓜等做咗車身式樣，煮咗Ｄ茄汁煙肉雜豆意粉，用紙兜將佢地隔開咁放入去一角。再加西蘭花去填虛位，加半條星星腸仔。

做隻肥咀企鵝，再加多Ｄ西蘭花同芝士做裝飾，就完工啦。

一個二個都做得似模似樣架。剩咗既芝士唔好晒，可以整Ｄ花仔同星星做裝飾。

呢盒係Bibi既，佢隻企鵝係扁咀既。

早知我都加返條線係佢咀上啦。

你睇佢幾貪心，畢咗幾多意粉！

Bibi盒飯我拎咗返去俾爸爸做晚餐，叮完之後，芝士溶咗，眼仔都走晒位。我驚死唔夠餸，仲走去煎花蛤蔥花蛋餅俾爸爸，點知其實都好夠食架啦。

我呢，就食咗份車車三文治做晚餐，留返盒飯第二日拎返公司食。