晚餐@大中華飯店

我想食呢間好耐架啦，但一路都未有機會。

今次有人生日，又有人提議，梗係老虎蟹即刻和議啦。

呢間店好似大排檔咁款既，唔好預有咩好環境同招呼，但就有瓦遮頭既，叫做有空調又唔多涼咁咯，最好就天氣涼先黎食。要自己寫菜單，想飲啤酒汽水既話，唔該自己出去外面士多買。

招牌菜，黑椒咸豬手，幾乎檯檯都有點:好腍既。

冰鎮墨魚，切得薄，所以好似食極都食唔晒。

竹笙上湯菜心苗，呢款好正。

冰鎮四蔬，其實有五款，夏天去食就幾好既。

腐竹豬肚湯，呢味麻麻，我唔建議你地點。

清蒸花蛤，慳水慳力，只係加碟醬俾你就搞掂。

豉椒炒蟶子，都幾辣下。

蒜蓉蒸開邊蝦，呢度係一斤。

呢餐好抵食，唔計飲品同甜品，只係$920。

後尾我地又叫埋甜品，我原本都諗住唔食架啦，點知佢有樣叫芒果腸粉，我又未見識過，又想試下。

楊枝甘露芒果沙冰，我試咗一啖，好味!

宇治金時沙冰 

芒果涼粉 

我既芒果腸粉，原來椰汁外皮咁薄咁滑溜，包住麻雀咁厚既芒果件，加埋忌廉同芒果汁，正!另一位既火龍果涼粉。

甜品索價亦不高，但材料相當唔錯，廿零蚊有一款，刨冰就四十幾。比起一款甜品店，算係又平又靚啦。