但我地爸爸就鍾意有返D肉味既，我又唔係好喜歡咩燈芯之類果D糠味，咁就黎一個簡易版既去濕湯啦。
材料:果皮一角、赤小豆、扁豆、生熟薏米、豬展或排骨。想好味D既話就放多少瑤柱啦。
我地樓下藥材鋪好識做生意既，事頭婆一早就包好一份份，$5一小包。
我今次用排骨頭，其實去街市肉檔買既新鮮豬展或排骨，煲出黎啖湯都會比超市既好味D架啦。今次我仲專登用少少鹽醃佢一晚先煲，仲和味。所以大家見到舊骨咁色，係正常既。
我就放三粒瑤柱
赤小豆、扁豆就隔晚浸定，因為我會食晒D材料既，腍D會好味D。
凍水放果皮(浸軟刮瓤呢下唔駛再多講啦掛?)、赤小豆、扁豆都應該沖洗下先再隔水放埋入煲內，生熟薏米都應該洗下。我懶，冇浸到瑤柱，係咁意洗下，求其整散佢就放埋入去啦。
水滾就放埋D沖洗過既肉/骨入去
大概煲個零鐘就掂晒，放多少鹽調味啦。
幾好味呀，你地睇下D豆豆同薏米，已經好夠腍同鬆化。
所有材料都食晒，冇晒野，去到濕，又易煲。
你地仲唔試下?
我阿嫲最鐘意用你講嘅料嚟煲去濕粥.好好味架!
回覆刪除好，下次我改煲粥先!
刪除我飲親去濕水都係煲甜, 方便可以一樽樽咁拎出街飲!
回覆刪除好中意赤小豆既味!
我一係就放鹽，或者加冬瓜唔落肉就咩都唔加，當水飲。
刪除好好味甘.
回覆刪除係好味既，唔信你都試下。
刪除好呀！要煲煲去濕喇！
回覆刪除我呢幾個星期都有煲，一星期煲一次都好吖。
刪除我唔多識煲湯，有時見到乜就落乜……
回覆刪除比如赤小豆，我仲會落埋花生、眉豆、茨實丶扁豆或黃豆（睇下邊樣有就落邊樣）、蓮子、百合、杞子、紅棗，當然有果皮同龍眼肉，亦會有豬骨，又或雞腔骨等等……嘻嘻，如果有意米我都一樣會落，所以呢啲材料我都唔知夾唔夾，May 姐可否教下路呀？
如何係煲素湯，我就會放好多唔同既豆、花生、茨實、蓮子、淮山、杏仁、蜜棗/龍眼肉、各種果仁、紅蘿蔔、粟米芯(D粟米粒我剝晒，留返黎煮餸)同菰菌等等。尤其係眉豆同雞豆(又叫鷹咀豆)，會令煲湯更濃更香，不過，我唔會太狼既，適當配就算啦，赤小豆、扁豆唔係去濕湯我一定會落，你估乜都放咩?
刪除如果係比較正氣既，我就會用清補涼既基底去煲:我屋企會用淮山、杞子、龍眼肉、瑤柱、茨實、蓮子、洋薏米，再加豬展，呢個係我屋企既既習慣。
清潤既，紅蘿蔔(台灣果隻會較好味)、合掌瓜、粟米、蜜棗再加肉/骨。
栗子當造既話，就最好拎黎煲茨實(放四兩喎)，加塊果皮同兩粒蜜棗煲豬尾骨，對治腰骨痛有顯注功效。栗子要用鹽水洗刷乾爭，連殼用菜刀拍爆去煲，栗子殼其實都有食療效用既。
煲湯水都係想保健唧，所以最緊要注意寒涼溫熱既平衡。有幾樣規則係一定要守既，紅棗要去芯同埋凍水落，免得變成燥熱。果皮要浸軟刮瓤免濕熱。煲蓮藕鱆魚既話，加一把綠豆就會冇咁燥。煲親菜湯就要湯滾先好落菜。好多野都可以偷懶，但上述幾點就應該做。
很感謝May姐這詳盡的表述，原來煲個靚湯真不容易。最近我這處蘋果大豐收，別人給了我很多（再加上我買的）就不知怎打發？我想用粟米，紅蘿蔔、南北杏、蜜棗、龍眼肉、杞子…然後用豬骨、煙肉骨來㷛，這樣的煮法可以嗎？再：紅棗與蜜棗、蜜棗與龍眼肉，這是否不可同落？
刪除你呀，咪成日大雜燴至得架，蘋果(一定要去芯，皮反而可留)蜜棗加南北杏去煲湯都好夠潤架啦，放唔放肉都得，唔駛搞到咁複雜既。
刪除簡單黎講，紅棗係補氣養血同安神既，而蜜棗就潤肺(但佢係在糖水中煮過再製乾既，所以糖尿病人就要注意啦)，龍眼肉有補益作用，適合體虛者，但佢都會燥架，要適量。有個好簡單既養生食法，夾兩粒龍眼肉，加一粒大南杏，就咁放入口咀嚼，慢慢吞下，每日一次，體虛者可用。
紅棗、蜜棗同龍眼肉基本上都係甜既，據你配湯既材料去取捨，放一樣就好啦。俾你易記D，例如煲蘋果、雪梨、西洋菜、大白菜、紅青蘿蔔等清潤老火湯，仲有配栗子，蓮藕鱆魚等湯，就梗係蜜棗較為適合啦。至於配淮、杞既湯，好似羊肉、清補涼等，龍眼肉就好D啦。
至於紅棗咯喎，我比較少用，因為佢較補，用黎煲雞湯多。我地呢，就興用去核紅棗煲紅棗水飲既，睇你幾多人飲啦，我地兩個都用半斤架，先浸去核紅棗，等佢飽吸水份，先凍水落煲，水滾後計，中火煲45分鐘，就飲得，好甜架啦。記住熄火之後就唔可以再返滾，會燥。怕佢涼咗，可微微加熱，但不能煲滾。唔好放入雪櫃當凍飲啦，飲凍野冇益架!
哈哈…你又給我塞錢落袋，謝謝你！
刪除