晚餐在百份百

樓下嚐味結業，好不容易等到呢間新開張，幾日後就同街坊黎試下。

我地一人一碗中湯，熱度勉強可以，但太小氣，扁扁的碗都只得半碗。

啫啫雞煲，真係有幾件薄薄豬膶，個煲仔都燒到好熱，上檯時見到D汁係滾既，但太少汁，好快就粘底。最失敗既係雞件好下欄，翼尖上截同雞脾與雞腳連接既關節位的一小塊，都當是一件雞奉客。最大問題係雞件未熱到透，入面微暖架咋。

茄子斑腩煲，呢樣似樣D，起碼茄子既色水同質感都到位，所謂斑腩，大家心照啦，咪鯰魚柳咁上下質素既魚片咯，我都冇乜要求咯。

一人一碗白飯，新開張多人等位，我地都要等十幾張飛先到。人手唔夠，水都冇杯，暫時印象好差。加上我食完返上樓就肚仔唔舒服，可能係D雞出事。但我都唔會茂茂然列佢入黑名單既，或者自己當日狀態差呢?咁近便，都會俾多次機會佢既。

係度食，人均消費五、六十蚊，同大家樂咁上下。

但呢度勝在選擇多，上面既湯泡飯我都有興趣試下。

呢度話自己咖喱醒喎，不過如果唔係原煲炆出黎既，就咁加件扒，添D汁，又冇乜興趣喎。

如果帶爸爸黎，我會叫個鴛鴦焗飯佢食。我就會試肉燥飯。

唔太喜歡大塊肉，所以未必會點扒。

廚師推介A，我諗下次都可以試下既。

見過隔離檯既粉絲煲，賣相麻麻。