早餐@百份百

話咗俾多次機會佢，咁我就黎試下佢既早餐啦。

一般扒餐都比大家樂貴幾蚊

無可否認，呢度既多士算唔錯既。人地中環利源西街既茶記，都只係賣$18，佢敢收人$21。

我甚少幫趁食三文治既，但離遠見到斜對面大叔果份三文治又好似幾對版咁。

湯粉麵都比人地貴一兩蚊

 有意大利蕃茄濃湯通粉，我有興趣試喎。爸爸就要咗餐蛋麵。

點知我碟野原來係咁既! 係湯通粉上加咗D煮過既蕃茄粒加好似罐頭五香肉可咁霉質感既肉碎粒。唔可以叫做肉碎，因為係好難發現佢地既芳蹤既。原來咁就叫Minced Pork and Macaroni in Italian Tomato Soup，真係失覺晒! 咁即係大家都唔需要考慮點佢既所謂乜乜物物既蕃茄湯餐點啦。

配蒜香多士半件，味道正常，亦新鮮，用咗比普通方包厚身少少既包黎做，但又未至於係厚多士喎。即係人地一磅方包八件，佢切成六件咁上下啦。唔記得影相，但絕對係及格有餘既。

至於早餐既靈魂，即係杯奶茶，實在太令人失望，可以講係好差，味道不足，又唔香之餘，又澀澀地。我一向飲奶茶唔放糖既，今次都要放少少黎麻醉自己先可以啪咗佢。

最唔可以接受既，係佢地既空調做得好差。係門口等位時已覺得好大陣油煙味，d人想話唔等位，買外賣，收銀都話外賣最少要等廿分鐘，咁就認真離譜啦。

坐落，一路見住廚房既蒸氣不斷噴出黎。我地已經坐得唔算近廚房，都一路食一路出汗，好難頂。

所以，免得過，我都唔黎呢間啦。