話咗去搵小雞既，所以我地食完飯就出發啦。
我一早就係網度download咗ｄ指引我地去坐穿梭巴士既圖片，但爸爸話：我以前係度開過工架，呢頭我不知幾熟呀，駛乜睇吖，你跟住我行得啦。
好順利去到巴士站，但打晒蛇餅，有工作人員叫我地去龍尾排隊，我地就照去。一路睇住不斷有巴士黎，我地就照上車。架車行行下係燈位停低，我地見到咁啱隔離架旅遊巴都標示住去展貿架喎，點解我地兩架車，一架行左，一架行右既？
2009年1月31日 星期六
Buddha Hut
今日，想去展貿搵小雞，但我係路盲黎，要搵枝盲公竹至得。於是，我就氹爸爸啦！
我：不如，我地今日去上次淘大果間素食鋪度食飯吖。
爸爸：好呀！（食素喎，佢梗lur飯應啦。）
我：咁食完去展貿行下咯，有微型展呀。
爸爸：好呀，咁一陣放工去啦。
就係咁，我地又去咗Buddha Hut食飯。今次爸爸要咗沙嗲豆腐扒飯加中湯($36)，我就點咗叻沙蔬菜百頁米線加中湯($26)，不過奇怪既係我果碗野唔係應該有ｄ叫百頁既物體既咩？點解我唔多覺既？
上次飲過既中湯，又熱又夠味，所以我地今次又叫。今回湯裏面有花生、茶樹菰、粟米、紅蘿蔔同ｄ不知名既好似樹皮咁既材料，又係好熱，好好味。如果住家湯係咁，真係日日飲都制。
爸爸既沙嗲都唔錯，又係好多菜既。我果碗叻沙呀，真係正呀！幾鬼熱呀，面頭放既係生銀芽黎，好明顯碗底亦放咗未煮過既生菜，但ｄ湯就夠熱到可以淥熟佢地，仲可以保持到成碗野仲係好熱既，又夠香，我差唔多飲晒ｄ湯，仲冇口喝既感覺添。以我呢個味精敏感既人測試過，佢地係好合格既，大家可以放心帶老人家去食。
呢度既食物，其實都算價錢實惠既，只係如果要飲野就要加錢，依家普通快餐店都係咁啦．
2009年1月30日 星期五
牛年年禮
今年又收到幾盒年禮，人家老遠送黎俾我，所以每次我地都會自奉，唔會轉送出去既。
今年收既全部都係餅食，先黎一罐「罪惡」曲奇（唔食對自己唔住，食咗又對裙頭、褲頭唔住），呢盒係8 Mix呀！仲有果仁係入面添，點算呀？仲好味過 4 Mix添！初二收返黎，夜媽媽返到屋企，爸爸都要整件先，到初四，已經唔見咗一大半啦，我睇怕我再唔食，初五放工都未必有機會犯罪啦。
可能人地諗住我家有位小姐啦，所以揀咗呢盒哈囉媽咪葡萄夾餅俾我。
呢盒就勁啦，唔打得都睇得呀！
打開，超級靚啦，又係獨立包裝既曲奇黎，屋企果兩位一睇到，就嘩嘩聲啦，就黎開飯都要整件先。
我諗最特別都係芝士味果件，咸咸地架喎。
你地估錫紙包住果粒係咪朱古力黎架拿?
2009年1月29日 星期四
2009年1月28日 星期三
牛年開年團拜
年初二，先去堂兄家拜年，吃一碗魚蛋粉，再坐多一會再去下一站．
老規矩，一眾兄弟姊妹皆會到香港仔團拜，每次大家都會分別自攜食物到會。
今年，食物可真豐富，有紅燒元蹄、白切雞、羅漢齋、沙律、魚生、壽司、朱古力蛋糕、士多啤梨慕司、綠茶紅豆慕司、雞翼、二個大薄餅、盆菜、菜乾排骨粥等等。
元蹄冇影到，因為上檯之後大家早已開動，都唔得閒影啦！呢只係三家姐煮的切雞：
盆菜，因為不合我地果班年輕人（姨甥，姪仔，姪女等）口味，所以剩了很多．
壽司魚生變主打
甥女做的蛋糕及慕司，大家都讚好味！
沙律亦是例牌菜
大食會必備的大薄餅
雞翼又點少得呢？
那我到做了什麼吃食呢？
材料有：鮮蘑菰、鮮冬菰
蛋絲
紅甘、筍黃芽白
切片年糕（一只鼎這個牌子口感比較好）
大家總算猜到吧，對了！就是簡化版上海炒年糕了。自家製，可以只放少許油，自然不會肥膩．
廿多人，齊齊開動，吃過不亦樂乎。一大鍋粥，轉眼即吃過清光。
在此祝大家豐衣足食，一年好過一年！
2009年1月25日 星期日
2009年1月23日 星期五
第一次的單對單成人課
因為朋友的朋友想做一份特別的情人節禮物送給她的丈夫，所以找了我來幫忙。其實除咗同事同親戚之外，我只教過小朋友及青少年，未正式教過陌生既成年人。
初時她說想做一盆迷你花（最好是玫瑰），但距離情人節實在近，而且她連玩粘土的基本概念也沒有，怎能三言兩語，一小時就可以做到一盆玫瑰呢？這可不是紙花啊！所以，我提議她改做情人節蛋糕。
這位大朋友從來未接觸過粘土，莫講粘土啦，連基本的工具也沒有。所以，通過這中間人的轉達，我只帶備了做蛋糕要用的東西了。
怎知，我們見面後，就聽到試探的話語：「她說不想做蛋糕，可否做回花呢？」我只好答：「嗄，我沒有帶其他用具啊！」唯有相勸：「如果你從來未玩過粘土，是不會一下子可以做一盆花的，而且時間緊逼，我又只教你一次，就算我肯教，亦沒時間讓粘土乾透去做下一個步驟。若是硬來，做出來的成品也不會好。還是做回蛋糕吧。」
接著，我取出相片：「看，這個芒果蛋糕也不錯呀。」又取出秘製「情人牌」，「把這個放在蛋糕上也不錯呀。而且做蛋糕可以一堂學完，今晚就完成作品。」
還好，她終於接受我的意見。於是，立即開始。
我先要她看過照片，然後講解製造過程。但事先聲明，希望她可以一切自己動手完成。我先讓她自己搓顏料入粘土內，再教芒果筒及蜜瓜粒的做法，由她先做一次看看，再放一粒配件之成品讓她瞧著辦。
因時間關係，配件完成後即用風筒吹至半乾。之後，我隨意取用一粒粘土，示範如何做蛋糕底，再教做芒果片及貼上芒果片的方法。講解完畢，又要她自己一手一腳包辦，只是間中提點一下。
完成上述步驟後，芒果蛋糕已有雛型。接著貼芒果筒，再粘蜜瓜粒。最後，送佛送到西，我出術「醒」了一粒車厘子給她放在蛋糕上(其實初時我是打自要她製車厘子的)，再貼一張靚靚情人牌。然後又要出動風筒把蛋糕略為吹乾，再塑上光油，情人節蛋糕就此完成！
看一看時間，也花了兩句鐘才完成呢。
最後，為人為到底，送她幾張蛋糕紙(恐防她失手剪錯o麻)，著她回家慢慢剪出靚靚墊底紙，又送她一張迷你情人卡。今回可算是免費的情人節套餐，「豉油」及「雞」也出了。總算沒負人所托，讓這位初次見面的朋友歡歡喜喜護著蛋糕回家去。
這位幸運男士, 真的恭喜你了! 娶了一位傻傻的太太, 又有一個傻傻的朋友肯為她找人幫忙, 找著了這個傻傻的May姨, 花了兩位師奶四個工時 (2 hrs. x 2)才完成你這份特別的情人節禮物. 希望你珍而重之, 好好留為紀念啊!
2009年1月22日 星期四
2009年1月20日 星期二
2009年1月18日 星期日
牛頭角一遊
今朝一早就去牛頭角果間大榮華圍村菜飲茶，9個人，叫咗兩籠蝦餃、兩碟鳳爪、叉燒腸、蝦腸、三碗白果粥、蜆芥鯪魚球、芋角、腐乳生菜、兩個雞球大包、叉燒包、潮州粉果、蓮蓉包、上湯魚滑鮮竹卷等等。可能姑姐遇到個學生家長係度做，所以免茶芥掛，埋單只係$173咋!仲有好多懷舊點心冇叫到添。
同大家分手後，打算係附近商場逛逛。先去牛頭角下村走走，食咗一串墨魚，買咗兩張揮春。爸爸話要去淘大商場二期地下果間Buddha Hut睇下，原來佢早有預謀既，佢一早就想試下間野。好啦，又係度食午餐。
呢間係話明冇蛋同奶成份既素食快餐，地方乾淨企理，收銀果位哥哥仔尤其友善，所以第一印象十分好。
食物當然要自取，我叫咗香菜炒飯加老火湯($26+$4熱飲轉湯要加錢)，爸爸要叉燒飯加奶茶($28)。老火湯足味兼熱辣辣，紅米飯口感適中又係出晒煙既，咁既溫度就俾人好大信心啦。再睇下飯邊同叉燒下的配菜，份量相當多，所以我地好乖，全部食晒。通常係外面食飯，我地係會盡量唔食淨野既。如果真係預咗有野食淨，我地都會盡量帶備食物盒去打包既。
如果你見到個師奶，食食下野，係手袋度搵個食物袋出黎包起d野走，可能就係我啦!
走果陣見到門口個雪櫃有好多蛋糕，亦都係冇用奶同蛋做既：
訂閱：
文章 (Atom)