搵小雞

話咗去搵小雞既，所以我地食完飯就出發啦。

我一早就係網度download咗ｄ指引我地去坐穿梭巴士既圖片，但爸爸話：我以前係度開過工架，呢頭我不知幾熟呀，駛乜睇吖，你跟住我行得啦。

好順利去到巴士站，但打晒蛇餅，有工作人員叫我地去龍尾排隊，我地就照去。一路睇住不斷有巴士黎，我地就照上車。架車行行下係燈位停低，我地見到咁啱隔離架旅遊巴都標示住去展貿架喎，點解我地兩架車，一架行左，一架行右既？

哎呀！我地搭錯車呀！去咗MegaBox。既然都黎到啦，就去下大家成日提住既Spotlight啦。裏面真係幾多野賣架喎，如果係早幾年既我，一定大出血唧。原來我咁好定力既，走到入去，見到有想買既貼紙之類野，就係心裏面諗：我其實都整到架喎。所以就唔買啦，最後，只係買咗把鉸剪仔咋，我諗住用黎剪紙蕾絲。叫做到此一遊後，就行去展貿啦，沿途反而見到ｄ去完動漫行過黎shopping既人。

到咗展貿，先去買飛，我都驚買錯飛架。咁咪問下人裏面係咪有微型展既先？因為我只記得小雞擺檔果度係有埋微型展既。賣票既工作人員見我地咁大年紀，唔通呢兩位係黎睇動物展，唔係黎睇動漫展既？佢同我地講：動物展果便喎！（買飛之前，爸爸已經問：動漫展黎架喎，你真係想睇呢ｄ野咩？我話係，因為我想去探下小雞。）

就係因為咁，我地擾擾攘攘之下，已經四點啦。個女仔收咗我$100，俾咗兩張飛我，找返$50俾我，跟手就有個保安咁款既工作人員行過黎話：四點啦，你地要係張飛度畫上$15架。

我醒啦，即刻話：嗄！咁點解佢收我$50架？

工作人員：咁呀，你俾返錢人啦。

個女仔傻下、傻下，竟然想俾返$100我喎！我話：你只要俾返差價我就得啦。就係咁，我亦都傻下、傻下慳返廿蚊。

入場人仕之中，睇怕我地兩個最老餅啦。但都要頂硬上架，一、二、三，先去搵H3個檔先。一搵就俾我搵到啦，仲一眼就知邊個係小雞添。

我眼碌碌咁望住小雞，佢就同隔離個女仔好驚訝咁望住兩個老餅。

認唔認得我呀？我係May姨呀！跟住指住爸爸介紹俾佢識，“爸爸呀！”之後，我拎咗一個利是封出黎送俾佢，再拎廿蚊出黎幫佢買包貼貼。

小雞：唔駛收錢啦，你俾咗呢個我。

我：呢封唔係利是黎，係我俾你既信物呀（裏面有可以證明我身份既野係度）。

原來小雞已經看檔看咗四個鐘啦，仲打算收檔添。好彩我咁啱黎到咋，如果唔係就見佢唔到啦，我地總算叫做有少少緣份啦。佢係第一個見到我真身既blog友呀！

等我影返ｄ微型展既相俾大家睇下先！

 

 

我最欣賞呢ｄ臘鴨，有ｄ搞笑，好想試下整．

 

 

呢檔唔知係咪艾美既呢？

 

既然黎得咯，咁就行個圈，買少少野先走啦。去姬姬度執少少野先！

因為展場仲有三樓既，所以出咗地下既展館，工作人員會係我地只手背打個印仔做記認。

爸爸想縮沙架，但一場黎到，上埋三樓望下啦。我地只係行咗一圈，叫做影幅相就走啦。

事後，爸爸話：一路行，我一路滴汗呀。冇人好似我地咁老架！

我：做角色扮演既後生仔冇屋企人架咩？唔通佢地ｄ家長黎捧下場都唔得咯喎？

冇錯，我地係唔屬於呢個世界既，就當我地用叮噹既隨意門行咗入另一個國度內探險啦！